Newcastle United an chak, UCL an hnaih

Newcastle United an chak, UCL an hnaih
Ningani zana English Premier League inkhel awmchhunah Newcastle United chuan 4-1 in St James Park-a an mikhual Brighton an hneh a. Pathumnaah insawh nghetin Magpies hian champions league khelh phak an hnaih leh zual.
Pathumnaah insawhnghet tura chak mamawh Newcastle hian an khelh hnuhnung bera Arsenal sawptu Brighton lakah an khel tha viau a, chawlhlawk hmain goal hnih an thun hman. Minute 25-naah Brighton player Deniz Undav chuan an lamah a ti-goal-a mualneitu hmahruaina goal a thunsak. Minute 45+4-ah Dan Burn chuan Newcastle goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Brighton in goal an thun hmasa a, minute 51-naah Deniz Undav chuan an khingpui lakah goal a thun a. Chawlhlawk hmaa a mualphona goal hmang vekin a khuh bo. Undav goal thun hnu hian hun tawp dawn hnaih minute 89-naah Callum Wilson chuan Newcastle goal thumna a thun a. Minute 90+1 ah Bruno Guimarães chuan an goal lina a thun zui leh a, 4-1 in an chak zui ta a ni.
An mualah an chak leh tak vangin Newcastle hian khelh 36 atanga point 69 hmuin pathumnaah an insawhnghet a, champions league khelh phak an hnaih leh zual. An hnuai chiaha awm Manchester United in an khingpui hneh pawh ni se Magpies hi an lehpel dawn chuang lo va, Magpies hian UCL khel phak turin point tam an mamawh tawh lo.