MNF-in party atangin an chawlhtir a, Dr K Beichhua, MLA chuan a lunglen thu a sawi. Mak a ti a, chu ai pawha a rilrua a thawh dan chu lunglenna lam a nih thu a sawi.
-- Advertisement --
“Ka lung a leng khawp mai. Ngaihzawngte’n min then thut ang hi a ni a, a hrilhhaithlak,” a ti a, MNF party nuam a tih thu leh party-a a awm lai a ngaih thu a sawi.
January ni 25-a MNF-in party atanga an chawlhtir Dr Beichhua, Siaha bialtu hian 2011-ah MNF a zawm a, “Nuam ka ti a, thahnemngai taka ram tana ka thawhna party a ni a. Kan inngeih tlang a, kan lungrual a, kei takngial pawh min duhsak a, MNF hi nuam ka ti a. Hetia min chawlhtir hi, a lunglenthlak khawp mai,” a ti. “MNF hi opposition nih lai atanga thinlung zawng zawnga ram tana theihtawp ka lo chhuahna a ni,” a ti bawk.
Party dan kalha cheah puh a ni a, mahse party dan kalha a chetna han sawi tur a hre lo. “Ka bial mipuite’n min duhsak a, min lainat a,” a ti a, bial fang tura Aizawl atanga a kal kha Kawlchaw-ah leh Siaha-ah mipuiin ropui taka an lo hmuah thu sawiin, MNF, BJP, ZPM leh Congress an tel vek thu te, bial chhung khaw hrang hrang a fan zuinaah pawh mipuiin an lo hmuah thin thute sawiin, “Chu chu dan bawhchhiatnaah an ngai a nih chuan, chutiang chuan a ngaih theih ve tho ang,” a ti.
Niawhtlang-a a zinin an bialtu MDC, tun hnaia MNF atanga chhuakin a lo dawnsawn thu a sawi a, Chhuarlung-ah an bialtu MDC, BJP-in a lo dawnsawn thu te sawiin, “Heng te hi dan bawhchhiatnaah a ngaih theih ang em aw ka ti a. Ka bialah hian CM rawn zin se, eng party mi pawh ni se theihtawpin ka lo dawngsawng dawn a, chutiangah chuan ka lo ngai mai a,” a ti.
“Mipui pawhin party party an sawi lo a, min duhsakin min lo hmuak tawp mai a. ‘E, tumah rawn kal suh u,’ ka ti thei lo a. Min khawngaihtute an ni a, tha takin hun kan hmang a,” a ti a, tumah a sawi chhe lo a, tu party mah a sawi chhe lo nia sawiin, “Tumah ka dem lo a, tu party mah ka sawi chhe lo a. MNF hruaitute pawh mimala demna ka nei lo, kan CM pawh ka dem lo,” a ti.
A kal zel dan tur a hre bik lo a, sawi theih a nei lo niin a sawi a, “Ka kal zel dan turah sawi theih a awm lo. Min duhsaktute, bial mipuite nen te kan inrawn ang a, ‘E, chawl mai rawh,’ min tih leh ka chawl ang a, ‘Chhunzawm zel rawh,’ min tih leh ka chhunzawm ang a, tunah chuan chung chu ka ngaichang rih,” a ti.
A chunga thil thleng chu Pathian remruatah a ngai tih a sawi a, “Ringtu kan ni a, ka chunga thil thleng pawh Pathian remruatah ka ngai,” a ti a, “Pathianin keimah, khawtlang leh ram tana kawng a buatsaih zelnaah ka ngai,” a ti bawk.
Dr K Beichhua hian Siaha-a awm zui a tum a, “Aizawlah in kan nei lo a, a sakna tur pawh ka nei lo a. Siaha-ah ka awm ang a, heta tangin theihtawp kan chhuah ang chu,” a ti.