NGO lian hoin SIR vil dawn

Election Commission of India ruahman anga electoral roll enthat, Special Intensive Revision 2026 neih mek chu Mizorama tlawmngai pawl lian ho chuan a tawpna atana belh leh paih theih hun hawn chhungin uluk taka vil zui an tum.
Central YMA, Mizoram Upa Pawl, Mizo Hmeichhe Insuihkhawm Pawl, Mizo Zirlai Pawl, Mizo Students’ Union, Central Young Lai Association, Mara Thalai Pawl leh Central Young Chakma Association hruaitute chu Nilaini khan Aizawlah an thukhawm a. SIR neih mekah enumeration form digitization tih zawh a ni ta chu a lawmawm tiin, thawktute chungah lawmthu an sawi a. July 5 atanga August 4 chhunga inthun belh leh paih dilna hun hawn turah India khua leh tui dik tak chauh roll-a thun an nih theihnan huaisen taka hma la turin a buaipuitu ERO/ AERO/ BLO an ngen tih an sawi. Hearing neih hunah pawh uluk takin NGO hrang hrangin mahni huamchhung theuhah an vil zui dawn tih an sawi bawk.
Tarlan tawh angin, Special Intensive Revision of Electoral Roll neihah hian Mizorama voter 46191 paih (delete) an ni a. SIR tih zawh hnuah vote nei 828877 chhinchhiah that a ni a. Vote paih zinga 21290 chu thi tawh, 8352 chu chhuichhuah theih loh, 13992 chu pem tawh, 2245 chu duplicate enrolment an ni a; 312 chu sakhaw thil avanga inziaklut duh lo an ni.