Ruihhlo donaa pui turin NCB sawm Aizawlah office din tumin ruahman

On Jul 2, 2026 10 0

New Delhi-a cham mek Excise & Narcotics minister Lalnghinglova Hmar chuan Nilaini khan Narcotics Control Bureau director general
Anurag Garg a kawm a, Mizorama ruihhlo do kawnga hmalakna kal mek leh hmachhawp an sawidun.
Minister hian ruihhlo do kawngah Excise & Narcotics Department-in awmze neia theihtawp a chhuahna chuan rah tha a chhuah mek tih a sawi a. Kum hnih emaw lek chhungin heroin tam tham tak an man tawh a, sawrkar department leh tlawmngai pawl thawhho that azarah ruihhlo man pawh a pung zel tih sawiin, “Ruihhlo hi a rem ta a ni lo a, a hma anga a tlawm ta lo hi a vang sawt ni ah kan ngai,” a ti. Kohhran leh khawtlang nen tangrualin ruihhlo ti lo tura inzirtirna pawh kalpui reng a ni tih a sawi bawk.
Narcotics Control Bureau (NCB) puihna hrang hrangah Lalnghinglova Hmar hian lawmthu a sawi a. Tunhnaiah NCB atangin ruihhlo donaa hman atan lirthei engemawzat an dawng a, tangkai taka hman mek a ni tih a hrilh.
Mizoram chu Myanmar ramri depa awm, India rama ruihhlo rawn luhna kawngka pakhat a nih avangin ngaihpawimawh a ngai tih a sawi a. Excise & Narcotics Department-in sawrkar laipuiah ministry zawmpui a neih ve loh avangin, chak zawk leh awmze nei zawka hma la turin NCB nen thawhhona tha an neih zel a ngai tih sawiin, ruihhlo donaa hman tur lirthei mamawh belh a ni tih a thlen.
NCB director general chuan, ruihhlo do kawnga Mizoram hmalakna an lo hre thin a, an lawm hle tih a sawi. Minister thu thlen chu theihtawpa an bawhzui tur thu sawiin, Aizawla NCB Zonal Office dinna tura approval awm tawh chu, a tihhlawhtlin kawnga hma lakpui turin Excise & Narcotics minister hi a ngen a ni.
Ruihhlo zuar leh tawlhru mante chu an phu tawk hremna pek ngei a pawimawh tih a sawi a. Chumi atan NDPS Act 1985 hnuaia Special Court din leh, man nawn fo (habitual offender) te khuahkhirh theihna dan hman tangkai tha a tih thu a sawi bawk.
Inkawmnaah hian ruihhlo do kawnga tangkai tak, sawrkar hnathawk leh informer-te cash award dawn thin, NCB a awm mek chungchang pawh sawi a ni a. NCB atang hian additional DG Vineet Vinayak IPS leh deputy DG (Operations, Enforcement, and Operational Coordination) Neeraj Kumar Gupta IPS chuan an hotupa hi an tawiawm a ni.