Ngopa in khaw fai ber nih lawm

Ngopa in khaw fai ber nih lawm
Ngopa khua chuan Mizoram khaw fai ber lawmman an lak chu Thawhlehni khan an lawm.
Mizoram sawrkar UD&PA department-in khawpui fai intihsiak a buatsaih thinah kum 2022 chhunga khawpui fai inelnaah category-I Aizawl Municipal huamchhunga ward fai, category-II district headquarters zinga khaw fai leh categiry-III khawpui dang lian zual deuh te endik an ni a. Lengteng Assembly biala awm Ngopa hian category-III ah hian fai ber nihna hauhin, hun engemawti chhung hemu huanga fai ber nihna hauh tawh Biate a khum a ni.
Khawpui fai ber nih lawmna hmanpuitu Health & Family Welfare minister Dr R Lalthangliana chuan Mizorama khawpui fai ber nih chu thil harsa tak a ni tiin, Ngopa khua chu chhuanawm a tih thu leh an thawhrimna fakawm a tih thu a sawi.
Lang thei lo faina chu rilru hrisel a nih thu sawiin, “Rilru hrisel leh thianghlim chu chunglam lawm zawng a ni. Ngopa pawh in khua a fai mai bakah rilru fai leh thianghlim lo pu zel ang che u. Midang tana hnawk sak lo, midang tana malsawmna ken tlat hi faina hian a kengtel nghal a ni,” a ti.
Lengteng bialtu MLA Dr L Thangmawia pawhin he hunah hian thu a sawi a ni.
Health minister hian Health Sub-Centre Saichal, Hliappui leh Pawlrang Health & Wellness-a an hlankai takte chu a tlawh nghal a. Harsatna leh mamawh an neihte a zawt a. Health & Wellness-a hlankai takte hi a nih dan tur angin an thawk em tih a enfiah nghal a ni. Ngopa CHC pawh tlawhin damdawi chi hrang hrang a pe a, Hospital sak thatna tur hmunhma an en ho bawk.