NHIDCL thu in Mizoram sawrkar a then vel mai mai – CESJ

NHIDCL thu in Mizoram
sawrkar a then vel mai mai – CESJ
Mizoram sawrkar chu kawngpui siam hna thawktu NHIDCL thu thu in a then vel mai mai nia an ngaih thu Centre for Environment & Social Justice (CESJ) chuan an sawi.
CESJ thuchhuak chuan, tunhnaia kawngpui zauhna tura Selinga in thiah sak chungchangah a tuartu leh an chhungte bakah khawtlang hruaitute an kawmnaah, thil awm dan kimchang leh sawrkar atanga in chhuahsan tura an tihna lehkha an dawn enin, thil thlen danah a tuartu leh mipui thamlohna a len em avangin lungawihlohna lantir an remti tlang ta tih a sawi.
In thiahna order kengkawhtu executive magistrate-in khawtlang hruaitute a tham lo lutuk nia sawiin, sawrkar hnathawk, mipui chhiah pek hmanga hlawh la, mipui harsatna sutkian saka thlamuantu tur zawk chet dan chu pawi an ti takzet tih a sawi a ni.
Aizawl DC insawifiahnaah assessment thar NHIDCL-in a hnawl vek tia sawi chu compensation an la pe lo tih tifiahtu a ni, tiin, compensation chinfel hmaa thuneituten eviction order an chhuah chu ‘natural justice’ a kalh tih a sawi bawk.
Khawl (excavator) hmanga mi in thiah ‘Bulldozer Justice’ chu kumin November 13 khan Supreme Court thutluknaah misuala puh leh thiam loh chang pawh nise, bulldozer-a nawr chhe tura thupek siam turin executive-in thuneihna a nei loa, Rule of Law kalh a ni tiin, hmasawnna hna avanga in thiah sak chu a rang thei ang bera a in leh lo phu tawk zangnadawmna pe turin thuneitute an phut tih a sawi
‘Mizoram sawrkar hi Vai company, a bikin NHIDCL thu thuin an then vel mai mai niin a lang. Development hming chawia dan loa hna an thawh, kan thing leh mau, a hmuna cheng nungcha tichimit a, dan loa an leivung paihin lui an tihchhiat ti tawh lo tura thupek chhuah ngam si loa, hmeithai in thiat tura thupek an chhuah ngam si hi mahni ram leh hnam phatsanna tlingah kan ngai a. Thuneitute hi hetiang mai mai an nih vang hian, kan rama an hlawkna tura thawkte hian ram leilung fate leh kan environment an zah loh phah a ni,’ a ti.