Ni 18 chhung Covid-19 vei hmuh belh lo tawh

Kum laihawl velah Covid-19 hri a
hluar leh a, mahse vanneihthlak takin kum chawhnu lamah a zia; hri hi a zia telh telh a, September-ah hri hi a leng lo tluk a ni.
September ni 12-ah khan hri vei hriat thar an awm a, chumi hnu-ah chuan hri vei hriat belh an awm rih lo. Ani hi September ni 18-ah dam takin a chhuak a, hemi hnuah Mizoramah hri vei enkawl an awm rih lo.
IDSP te’n an chhinchhiah danin, thla liam ta September-ah khan Mizoramah Covid-19 hri kai hriat thar pahnih an awm a, dam takin an chhuak tawh ve ve. Ni 12-a mi bakah ni 6-a hriatchhuah pakhat a awm a, ani hi ni 11-ah dam takin a chhuak a ni. September thla chungin endik ngai pawh a tlem; thla tluanin sample 16 endik a ni.
August-ah khan hri hi a zia tawh a, thla tluanin hri vei hriat thar pali an awm. Vanneihthlak takin August aiin September-ah hri vei an tlem a, hrileng a ziah telh telh.
Kuminah hrileng hi April velah a hluar tan a, May-ah a hluar hle; May thlaah hian hri vei hriatchhuah mi 375 an awm a, June-ah a zia deuh, mi 116 an awm. July-ah 12 an awm a, a hniam zawnga a kal bakah a hniam chak hle.
Vanneihthlak takin hri vanga nunna chan pawh thla thum chuang an awm tawh lo; June ni 22 hnu-ah Mizoramah Covid-19 vanga nunna chan an awm rih lo.
IDSP te’n an chhinchhiah danin, Covid-19 hri vei hi Mizoramah mi 2,39,561 an awm tawh a, vanduaithlak takin mi 734-in nunna an chan tawh.