CADC-a MNF MDC 16 CEM hoin an bang

Chakma Autonomous District Council (CADC) sawrkarna siamtu, MNF member (MDC) 18 zinga 16 chuan party atanga banna an thehlut a, ZPM an zawm dawn tih an tichiang tawh. Kumin May-a CADC inthlanah khan seat 20 awmah MNF hian seat 10 la in, BJP leh INC-in seat 5 ve ve an la a, a hnu ah BJP leh INC member zinga 8 (4 ve ve) hian MNF zawmin, sawrkarna an siam a, MNF Legislature Party leader atana thlan Rosik Mohan Chakma chu chief executive member niin, executive member 7 a ruat a ni.
Thudawn danin, CADC-a MNF sawrkar hi ngelnghet taka a kal chhoh mek laiin, tunhnaiah Tuichawng biala MNF ticket-a ding tura inchuhna boruakah sawrkar hi nghing thei mai dinhmunah a ding reng tih sawi a ni a. Hun engemawchen chu inup deuh mah se, MNF ticket-a din tum Rosik Mohan Chakma hian seat chang lo tura a lan tak avangin, amah thlawptu MNF MDC 15 dang nen MNF atang hian 2023 September 29 khan banna an thehlut ta a. ZPM zawm turin an inruahman zui nghal a ni.
An ni bakah hian Congress MDC la awmchhun pawh hian ZPM hi a zawm dawn nia thu dawn a ni.
He thila a meizang hlaptu bera ngaih Rosik Mohan Chakma hian ZPM ticket-in Tuichawng bial atanga MLA chuh tura ngaih a ni a, October 4 hian Chawngte ah ZPM working president K Sapdanga’n a lawmlut dawn a, CADC-a ZPM sawrkar a pian theih nan an inruahman chho zui dawn nia sawi a ni.
MNF party hian Tuichawng bialah hian an official candidate atan CADC CEM hlui Durjya Dhan Chakma chu an thlang fel tawh a ni.
MNF MDC atanga bang ta zingah hian CEM bakah EM 7, deputy chairman leh advisor to CEM te pawh an tel a ni.