Ni 26 hnuah hri vei awm lo leh

September ni 17, Ningani khan Mizoramah Covid-19 vei enkawl lai an awm lo a, ni 26 chhung hri vei an awm hnuah Mizoramah hri vei an awm lo leh ta.
A hma ni, ni 16-ah khan Covid-19 vei enkawl lai mi pahnih an chhuak a, tihian Mizoramah August ni 21 hnua hri ve an awm lo ta chiah.
Hri vei hriatchhuah thar an awm ni tin tihna a ni lo a, mahse hriatchhuah thar an awm lo a nih pawhin a hma deuhva lo hriatchhuah, enkawl lai an awm zel thung.
Hri vei hriatchhuah hnuhnun ber chu September ni 11-a mite an ni a, mi pahnih an ni. Anni hi ni 16-ah an chhuak a, ni 11 hnuah hri vei hriatchhuah thar an awm rih lo bawk.
Tun thlaah ni 11 thlengin hri vei hriatchhuah thar an awm a, mahse thla hmasa lam nena khaikhinin a tlem hret hret. Tun thlaah hri vei hi mi pakua an awm tawh a, thla hmasa khan mi 35 an ni.
IDSP te’n an chhinchhiah danin, kumin mi 144-in hri an vei tawh a, March-ah mi pathum, April-ah mi 40, May-ah mi 57, August-ah mi 35, September-ah ni 17 thlengin mi pakua an ni. June leh July-ah hri vei hriatchhuah an awm lo.
Kumina hri vei enkawlte hi na tak an ni lo a, natna dang vanga inenkawl sa an ni tlangpui tih thu dawn a ni.
2025-ah khan hri vei zat hi 40 a ni a, kuminah a pung nasa hle. Amaherawhchu, hri a hluar tihnaah ngaih a ni lo a, doctor-te chua Covid-19 hi Mizoramah a awm ngheh tawh avangin hri vei hriatchhuah thar hi awm thin turah ngaih a ni sa tih an sawi.
IDSP chhinchhiah danin, Mizoramah sample 19,99,305 endik a ni tawh a, hri vei zat chu 2,39,819 a ni.