Ni 30 chuang vawk thi tawh lo

January ni 27 thlengin kuminah African Swine Fever (ASF) vanga vawk thi a la awm lo a, ASF vanga vawk tihhlum/suat (cull) a la awm lo bawk. Ni 30 chuang chu ASF vanga vawk thi a awm tawh lo.
AH&Vety department chhinchhiah danin, kum liam ta December ni 23 atang khan ASF vanga vawk thi report a awm tawh rih lo a, vawk thi hnuhnung ber chu Saipum-a mi a ni.
AH&Vety department hotute chuan ASF hrileng a zia telh telh tihna a ni an ti a, mahse hri a leng tawh lo tihna chu a la ni lo an ti.
Thlasik laiin hri hi a zia ang tih chu rin dan sa a nih thu leh he hri hi thlasik laia zia thin a nih thu an sawi.
ASF hi Mizoramah a awm tawh avangin a khat tawka rawn lang leh thin tura ngaih a nih thu an sawi bawk.
Nikum pawh khan he hri hi thlasik laiin a zia a, 2024 January-ah khan ASF vanga vawk thi a awm lo. Nikuma ASF finfiah hmasak ber kha February ni 9-a mi a ni a, Champhai district-a Leithum khuaa mi a ni.
ASF hi Mizoramah 2021-ah finfiah a ni a, 2021 March ni 21-ah Lunglei district-a Lungsen khuaah finfiah a ni. Hemi hnu hian he hri hian kum tin Mizoram a tibuai a, AH&Vety department lam chuan he hri hi a reh tak tak rih lo turah an ngai.