ZPM sawrkarin LC/VC-te thawhpui tha duh lo zawk – Lalruatkima

On Jan 28, 2025 8 0

ZPM sawrkarin LC/VC-te
thawhpui tha duh lo zawk
– Lalruatkima
Local council leh village council dinglaiten sawrkarin mipui tana thawk tura a tih, tih duh loh sawi tur an hre lo a; sawrkarin LC/VC-te a thawhpui that duh loh avanga inthlan sawn hma ta an ni tih MNF hruaitu Lalruatkima chuan a sawi.
Thawhtannia Mizo Hnam Runa inkhawmah MNF treasurer Lalruatkima chuan VC leh LC-te term ding lai ZPM sawrkarin thla 6 chuang zetin a pawt tawi a, dan kalha a hun hmaa inthlanna a buatsaih lui tur hi mipui rorelna (democracy) kalphung zahlohna leh pawngsualna nasa tak a tling tih a sawi.
Minister Pi Lalrinpuii’n LC leh VC zinga an party mi ni loten sawrkar thawhpui tha duh loah puhin an term pawhtawi sak a nih tur thu a sawi a. Minister Pu K Sapdanga’n party dang VC an la tam avangin hmasawnna hnathawh a harsa a, a rang thei anga inthlan buatsaih tum a ni tih a sawi bawk, tiin, “VC/LC dinglaite hian sawrkarin mipui tana thawk tura a tih an tih duh loh sawi tur pakhatmah an hriat loh laiin, hmasawnna hna thawhpui atana a dinglaite an thawhpui duh loh vang a ni,” a ti.
Ngaihdan inang lote inpawm tawn thiamna chu democracy chakna leh ropuina a nih laiin, ZPM sawrkarin ‘party bil sawrkar’ din a tumna langsar tak chu an hlawhtlinpui lohna turin vote hmanga dodal ngam turin mipui a sawm tih a sawi a ni.
ZPM sawrkarin mipui sawrkar ni lo, party sawrkar sawhngheh an tum ngawr ngawr avangin inthlan hun pangngai pawh nghak thleng ngam loin, VC/LC inthlan hi hnawhsarum takin puan a ni tih MNF treasurer hian a sawi.
VC/LC inthlanah Education department hnuaia zirtirtute chu a buai ber tur an ni tih sawiin, “Mipui min inthlan luih pui hun hi HSLC exam lai leh HSSLC exam tan dawn tep a ni a, inthlanna atan zirna in tam tak hman a ni dawn. Zirtirtuten zirtir hna an thawhna tibuai zawng leh zirlaite tana boruak dang siam hun loh lai taka VC/LC inthlan buatsaih luih tum hi ZPM sawrkarin zirlaite leh zirtirtute a ngaihthah zia tichiangtu a ni,” Lalruatkima hian a ti.
Enchhin sawrkar, mipui beisei pha silo tan pawh inenletna hun tha, insiamthatna hun a nih hlauh theihnan mipuiin sawrkar muthlu ben harhna atan ZPM vote lo ngam turin a ngen tih a sawi bawk.