Ni hnih chhungin heroin gram 900 chuang man

Excise & Narcotics Department chuan ni hnih chhungin mi pahnih atangin heroin kg khat dawn, gram 900.600 (hawng 75) an man.
Excise & Narcotics department Champhai District chuan September 27 tlai dar 5.30 khan New Champhaiah heroin 733.600 (hawng 61) chu Bolero pik-up MZ 01 X 9894 atangin an man a. Hemi kaihhnawihah hian lirthei khalhtu Lalhunrenga (40) New Champhai nia inchhal chu manin ND&PS Act 85 hnuaiah thubuai siamsak a ni. Heroin hi Mizoram ramri dep, Zorinpui atanga Bangladesh-a thawn tura ruahman a ni tih sawi a ni.
September 28 chawhma dar 10.00 khan Republic Veng Hmawngkai motor silna hmunah Excise & Narcotics department Anti-Narcotics Squad chuan heroin gram 141 (hawng 12) leh a neitu nia puh Lallawmkimi (33) ITI Vengthar Aizawl an man. Heroin hi Champhai atanga lak, chawhmeh kara thuhruk tih sawi a ni.
Excise & Narcotics department Anti-Narcotics Squad leh Central YMA Kumpuan Committee thawkdun chuan September 28 chhun dar 12.05 khan Aizawl Central Jail bulah heroin gram 26 (hawng 2) leh a neitua puh mi pahnih – David VL Nghaka (26) Central Jail Veng leh Lalhrilliana (22) Kolasib Rengtekawn, tuna Rangvamual Mel 3-a khawsa nia inchhalte an man bawk.