Ni hnih chhungin heroin kg.7 chuang hmun 3-ah man

Mizoramah heroin tawlhruk man tur a awm reng a, July 14 & 15 chhung khan Excise & Narcotics leh Mizoram Police chuan a hrang theuhin hmun li ah heroin manin, a vaiin kg. 7.391 a ni.
Mizoram kaltlanga state danga hralh tum heroin kg.5 chuang chu July 14 khan Excise & Narcotics Department chuan an man a, he thila inhnamhnawih mi pasarih pawh man an ni.
END hotute sawi danin, July 14 khan Saichal khaw bulah ruihhlo tawlh tum nia an thudawn bawhzuiin an duty a, chawhnu dar 2.15 ah an rinhlelh lirthei pahnih Bolero AR02 M 0543 leh Grand Vitara Car TR07 F 0451 chu hmuin an um a. Heng lirthei hi an tih din hnuah lirthei atang hian heroin kg. 5 & gram 114 (hawng 436) an man a ni. Lirtheia chuang, heroin laknaa inhnamhnawih mi pahnih Jahir Alam (23) Sepahijala district Tripura leh Maram Miah (32) Pandabpur West Tripura nia inchhalte chu manin an lirthei hi hrensak an ni.
He case an chhuizelnaah July 14 vek tlai dar 4.30 khan he thubuaia inhnamhnawih nia puh heng midang panga Lalngilneii (44) leh Zoramchuana (49) Hnahlan Champhai district, tuna Chaltlang Lily Venga khawsa mek, Vungkhanthawma (23) Champhai Vengthar Tlangnuam; Amir Hussain (31) Madhya Boxanagar Tripura; Sukanta Karmakar (35) Champak Nagar Tripura nia inchhalte chu an man belh a ni.
Heroin vanga mante hi NDPS Act tlawhchhanin thubuai siamsak an ni a. Thiamloh chantir an nih chuan kum 10 atanga kum 20 thleng jail tantir leh sumfai Rs. 1,00,000 atanga Rs. 2,00,000 thleng chawitir tela hrem theih an ni.
July 14 zing dar 2.00 vel khan Champhai Police team chuan Chalbawiha Junction Khankawn Police Checkgate bulah heroin gram 174 (hawng 15) chu Vanlalmuana (31), Farkawn Champhai District, tuna Tuikual ‘C’ Mual Aizawl nia inchhal kut atangin an man a. July 14 zan khan Champhai Police leh 42 Assam Rifles thawkdun chuan Zote khawdai, Zote – Bulfek (Myanmar) Road-ah heroin gram 73 (hawng 6) chu Lalvulliana (40), Kahrawt Champhai nia inchhal kut atangin an man.
July 15 zan dar 11.00 vel khan Champhai Police Chalbawiha Junction Check Gate duty-te chuan heroin, Zokhawthar leh Aizawl inkar service Maxi Cab pakhata chuang Vanneihkimi (30) Kannan Khampat Myanmar, tuna Zokhawthara khawsa mek nia insawi kut atangin heroin kg 1.329 an man a, he lirtheia chuang ve tho John Vanlalruata (19) Chanmari Aizawl nia inchhal leh Jonathan Biakthanpuia (20) Chanmari West Aizawl nia inchhal kut atangin gram 22 ve ve mansak an ni bawk.