Dr. Thangtea’n Council of Health-ah Mizoram tarlang Hriselna kawnga hma la tha ber Mizoram

CCHFW Conference hi July 14-15 chhunga neih niin Hyatt Regency, Dehradun, Uttarakhand-ah nghah a ni a. He inrawnkhawmna sang hi, Union Health & Family Welfare Minister, Ministry of Health & Family Welfare-a mi pawimawhte bakah state tina health minister te, health secretary te, leh mission director, National Health Mission te telna a ni a; CCHFW hi India Constitution Article 263 tlawhchhana din niin, India ram chhunga hriselna kawnga sawrkar hmalakna chungchanga inrawnkhawmna sang ber a ni.
CCHFW hawn niah Dr R. Lalthangliana chuan thu sawiin, Mizoramin hriselna tihhmasawnna kawnga hma a lak dante a tarlang a. NITI Aayog-in tehfung chi hrang hrang hmanga a tehnaah kum 2017-2018 atang khan Mizoram chu India rama state tenau zingah hriselna tihhmasawn kawnga hma la tha ber pakhatna dinhmun a hauh ziah tih a sawi a. Mizoram chu nau piang kum khat hnuaia lam thi tlem berna state (3 infant deaths per 1000 live births) a nih mek thu a tarlang bawk.
“Covid-19 hripui leng karah Mizorama medical college kan neih chhun Zoram Medical College chu Dedicated Covid-19 Hospital-ah kan puang a. Covid-19 hripui len hma kum 2019-2020 khan khum 300 a awm a, tunah chuan khum 480 kan nei tawh a, ICU khum pawh 50 kan nei hial tawh a. Ministry of Health & Family Welfare leh hmun dang dang atanga tanpuina hmuh hmang tangkaiin district tinah oxygen plant kan dah vek tawh,” health minister chuan a ti bawk.
Dr Thangtea chuan sawrkar laipui leh Mizoram sawrkar scheme hrang hrang kalpui mek bakah World Bank tanpuinain Mizoram Health Systems Strengthening Project (MHSSP) kan kalpui mek a ni, a ti a. Tun dinhmunah district hospital 3, PHC 3, UPHC 2 leh HWC-Sub-Centre 75 te tan National level NQAS certification dil mek a nih thu a tarlang a. Damdawi in changtlung leh felfai zawk neihna tura hmalakna hrang hrang SUMAN, Kayakalp, LaQshya, & MusQan kalpui a nih thu te, sawrkar laipui hmalakna Pradhan Mantri Jan Arogya Yojana (PMJAY) bakah Mizoram sawrkar hmalakna Mizoram State Health Care Scheme (MSHCS) chungchang a tarlang a, health insurance tihchangtlunna atan Asian Development Bank (ADB) nen Rs vaibelchhe 1000 project an siam thu a tarlang bawk a ni.
Mizoram chu India rama cancer chi hrang hrang vei tamna ber a nih thu tarlangin he natna bei let tura tan lak a nih dan a sawi a. Japan International Cooperation Agency (JICA) nen Rs. Vaibelchhe 700 project hmangin Mizoram State Super Specialist Cancer Research Centre (MSSSCRC) dinna tur a hmawr an bawk tep tawh thu a tarlang bawk a ni.
HIV/AIDS dona kawnga Mizoram sawrkar hmalakna chi hrang hrang tarlangin tunhnaiah NEC in Aizawlah HIV/AIDS Resource Centre sakna tur sum an pek thu a tarlang a, NEC atang tho in Rs. Vaibelchhe 13 man Central Medical Warehouse sakna tur hmuh a nih thu a tarlang bawk.
Ayushman Bharat hnuaia tihtur bituk zawng zawng an hun takah an tih zawh vek thin thu sawiin tun dinhmunah Health & Wellness Officer BSc Nursing graduate vek mi 300 chuang kan nei a, PHC 64 leh sub-center 309 chu Health & Wellness Center ah hlan kai vek an ni tawh a ti.
Mizoramin Medical College kan neih chhun undergraduate course (MBBS) kalpuina Zoram Medical College (ZMC) in batch tinah zirlai 100 an la thin a. MBBS batch hmasa ber kum 2018-19 a lut te chu kumin April thla khan an graduate a, ZMC ah internship an ti zui nghal a ni tih sawiin Minister chuan ZMC chu medical college thar naupang tak a nih avangin thanlen zelna leh hmasawn zelna turah mamawh kan la ngah em em a ni tiin, sawrkar laipuia hotuten an tanpui an mamawh thu a thlen nghal a ni.
Mizoram sawrkarin MoHFW hnenah Lungleia GNM School tihchangtlunna tur project an thehluh tawh chu lo pawm sak thuai tawh turin Dr Thangtea hian a ngen nghal bawk a, Zemabawk, Aizawla GNM School tihchangtlunna tur project an la thlen leh tur thu leh sawrkar laipui hotuten ngaih pawimawhsak ngei tura a duh thu a sawilang bawk a ni.
Health minister hi Esther Lal Ruatkimi, Principal Secretary, H&FW Department leh Dr. Eric Zomawia, MD NHM ten an tawiawm a ni.