Ni hnih chhungin kuhva bag 450 chuang man a ni

Tun ni hnih chhung khan Mizoram hmun hrang hrangah dan loa tawlhruk kuhva bag 450 chuang man a ni.
The Aizawl Post thudawn danin, Nilani zan khan Khanpui YMA chuan an report dawn bawhzuiin Tualbung leh Khanpui inkarah lirthei pahnih atangin Myanmar atanga dan loa phurh luh kuhva ro bag 70 an man a, Saitual Police hrilhin an ni hian an lachhawng a ni. Kuhva hi Myanmar ah Kg. ah Rs. 15 hisapin an la a, Aizawlah kg ah Rs.80 hisapa hralh leh an tum niin a phurtute hian an sawi.
Khanpui YMA hruaitute sawi danin, tunlai hian an khaw pawhtu kawngpui Tualbung nena an inkar hi siam mek a ni a, PCC pavement tura siam a nih avangin lirtheiten zawh rih lo turin Saitual bawrhsap thupek angin SP-in hriattirna a tichhuak a, hei hian zawm a hlawh lo hle a, a bikin kuhva ro phur ni ngeia an hriatten an zawh nasa hle tih an sawi. Kawngpui tha an duh avangin YMA hian hma an la ta a, thupek zawm loa zawh luite hi an lo man a, tuna kuhva phurtu truck hi a neituten Scorpio-in an ‘escort’ tih an sawi.
Saitual Police hotute sawi danin heng kuhva neitu nia insawi hi Chingngaihmani (36), New Champhai inti a ni.
Khanpui YMA-te hian kuhva phur truck pahnih dang an tlantlang hman tih hria in, Hmunnghak lam an hrilh a, an ni hian an khua an chhuahsan hman tih an hriat hnu ah Ningani chawhnu khan Sesawng lam hrilh leh an ni a, an ni hian an zawng hmu mai loa, haw an tum laiin Tuirini kam Tlak-al pengah kuhva ro phur heng truck biru hi hmu in an man ve leh a ni. Kuhva neitu hi Dawnnovi, Aizawl Dinthar niin driver-te hian an sawi a, bag 80 a ni.
Khanpuia kuhva phurtute hi Saitual Police-in an la a, police-ten Saitual lam an pannaah Buhban kawng lamah kuhva phur tho truck pahnih an man ve leh a. Kuhva hi Abdul-a, Silchar ta niin truck khalhtute hian an sawi a, bag 80 a ni.
Hetihlai hian Mamit lamah YMA-ten report an dawn bawhzuiin Thawhlehni zan khan dan loa Myanmar atanga lakluh kuhva rah phur an chang a, an chan thelh hnu ah information an inpek angin Darlak YMA-ten Darlak lei bulah kuhva phurtu truck pahnih hi an lo man a. Truck khalhtute hian Vairengte-a kudam atanga an phurhchhuah, Bairabi atanga an kualpui niin an sawi a, bag 70 a ni.
Thawhlehni zan vek hian Mamit Police-ten kuhva rah bag 150 an man bawk a. Thudawn danin, kuhva neitute hian an kuhva hi Vai ram atanga an rawn phurh chhoh, a ‘skop’ turin Lengpuia mimal pakhat dilah an chiah a, dil neitu hian hman a duh tawh avangin a lakchhuah tir niin an insawi. Challan an nei a, Zamuang to Bagha nia a inziah laiin, challan petu department a inziak lo thung a, thildang pawh rinhlelhawm a awm nia hriat a ni.
“Zamuang (tualchhung) kuhva anga lantir tumna niin kan hria a, tunhnai mai an lawh nia an sawi laiin, a rah hi a lian tha a, January chhoa lawh chu a ang lo, hei vang hian tualchhung kuhva a nih a rinawm loh a, tunhma emaw tunhnaiah pawh khulam atanga skop tura kuhva an rawn phurhchhoh awm kan hre ngai lo hrim hrim bawk,” YMA lam atanga thudawnna chuan a ti.