Ni khatah vawi engzat nge i inthiar thin?

Kan inthiar dan hian kan hriselnaah entir a nei a, kan taksa peng hrang hrang te hnathawh dan a that leh that loh te pawh a tarlang thei niin mithiam ten an sawi. Inthiar theia kan awm hi kan pianpui taksa hnathawh pawimawh tak pakhat a ni.
Tute pawh hi kan ei leh in te atanga kan taksain a hman bangnawi te paihchhuah leh ngai vek kan ni a, kan inthiar ngun dan erawh a inang vek lo ang. |henkhat chu nikhatah vawi khat an inthiar thin a, nikhata vawi hnih vawi thum inthiar thinte pawh an awm. |henkhat chuan inthiar hunbi an nei a, nitin a hunbi ah an ti thlap thin a, thenkhat erawhin hunbi tehchiam an nei lo a, a tul hun hunah an ti ve tawp mai thin.
Tichuan le, nikhatah vawi engzat nge inthiar tur tih te i ngaihtuah tawh ngai em. Tun tumah hian Times of India health section inthiar dan chungchanga hriattur pawimawh ni a an sawi te kan rawn tarlang e.
Nikhata i inthiar zat emaw, hunbi i neih leh neih loh emaw lam ai mahin, i inthiar khan i taksain a nawm phah em tih kha a pawimawh. Inthiar hunbi inang thlap thlapin a neih theih loh a, chuvangin kan taksain a nawmpui leh thatpui ni a an kan hriat kha a tha mai. Tu emaw chu a hunbiah thlap thlap a inthiar thin a, nangin hunbi i neih ve lem loh avangin buai phah chuang suh.
Nikhatah inthiar zatah pawh buai duh vak suh, nangma tana normal kha ngaihtuah mai rawh. I chhiat phahna i hriat loh a, nangmahah harsatna eng emaw tak a thlen phah chuang lo a nih chuan ngaihthat lohna tur a awm lo e.
Ngaihthat loh hun tur ve thung aw. I inthiar thin danah khan thil danglam a awm em tih kha lo inchik rawh. I inthiar thin dan ang lo deuh a chet a ngai ta fo a nih chuan eng emaw dik lo deuh a awm tihna a ni thei. Inthiar zo mumal hleithei lo va rei tak tak i thut a ngai thin a nih chuan eng emaw dik lo a awm tihna a ni thei bawk.
Damdawi thenkhat leh kan ei leh ina fibre tam dan a zirin kan inthiar dan a tidanglam thei tih pawh hriat tel a tha. Inthiar dana eng emaw danglam hlek ringawt chu thil pangngai a ni a, mahse, thisen a tel emaw, inthiar zawngin a na emaw a nih chuan mithiam te rawn thuai tur a ni.
Mumal leh tha taka kan inthiar theih nan fibre pai tam chaw ei tam a pawimawh a, tui in tam bawk tur a ni. Hei bakah hian thei rah, thlaihnah leh nuts lam chi te ei tam bawk tur a ni.