Mizorama heroin a hluar chak dan hi ‘rapthlak’ tia sawi tham a ni tawh. Kum 2022 chhunga police leh excise narcotics ten heroin an man kha chawhrualin ni tin pava khat thuak (Gram 230) a tling.
Nikum 2022 chhung khan Mizoram Police leh Mizoram Excise Narcotics (MEN) department te’na Heroin an man belhkhawm chu Kg. 83.011 a ni a. Kum 10 kal ta 2013-ah khan heroin an man belhkhawm chu Kg 1.308 a ni ve thung a; hei hi chawhrualin ni tin Gram 3.6 ang a ni a. Chumi awmzia chu, kum 10 chhunga heroin hluar danah hian, kum 10-naah chuan a let 63-in a pung (hluar) tawh tihna a ni.
-- Advertisement --
Kum 10 chhunga heroin hluar chhoh dan han en hian, kum 2017 atang khan a hluar nasa tan a, Pandemic lai pawh khan heroin hi a kiam phah chuang lo. Tun ami hi chu man chhuah chin chauh a ni a, man chhuah loha relhru hi engzat tak ni ang maw? Heti zat man chhuah tur a awm chuan, man chhuah loh hi a la tam zawk fein a rin theih a. Chuti a nih chuan, heroin-in kan ram a rawn luhchilh dan hi a namai tawh lo viau a ni.
Hei hi kan dinhmun mek a ni a, a result pawh kan thalaite-ah a lang chhuak mek a, ruihhlo ngaite enkawlna pawh a pung zel bawk. Tuna a lan danah hi chuan, ruihhlo lo lut tur lo dan dan tur ngaihtuahna aiin, ruihhlo lo lutin min khawih chhiat hnua inenkawlna tur lamah hian tan kan la ve chauh niin a ngaih theih rum rum tawh a. Sawrkar mi leh sate bakah tlawmngai pawl YMA te pawhin ruihhlo man chhuah kawngah nasa takin tha an thawh tih chu an thawh rah atangin a hmuh theih a. Hei hi chu heroin a lo luh hnua hmalakna ang chauh a ni.
Heroin lo lut tur, lo dang tura hmalakna hi liantham taka kan kalpui a hun tawh tih chu kan tun dinhmun mek hian a hril chiang ta hle a. Khawvela opium thar chhuak hnem ber dawttu Myanmar nena inri kan ni tih hi kan hriatreng a tha awm e.
Ramri kaltlanga ruihhlo lo lut lut tur lo dang tur hian ‘force’ liantham ve tak din a pawimawh a; hei hi mahni state bil chauh sum leh pai leh tha chakna chuan a tlin lo a ni ber tawh a, sawrkar laipui tha chakna hai luh dan kawng kan zawn thiam ve a pawimawh niin a lang.