Ni zung chakna

Ni zung chakna hman tangkai dan leh hnathawh a tih awlsam theih dan entirna – Mizoram Trade Facilitation Fair chu Ningani atang khan SELCO Foundation bultumin Mizoram Science, Technology and Innovation Council te nen tanghoa neih a ni a. SELCO Foundation director chuan trade fair chu hriatna leh hmalakna bul tanna a nih an beisei tih sawiin, thawhhona tha leh inpekna hmangin Mizoram hian ram pum huap ei leh bara intodelhna lamah tum nghet tak leh ruahmanna fel tak kan nei dawn a ni, tiin a sawi a.
Mizoram hian kan hman khawp Power kan la siam chhuah ve loh avangin kan mamawh zatve aia tam daih hi phai lam atangin kan chawlut a. Kan state chhunga siam chhuah ve hi chuan Power kan mamawh zat hmun lia thena hmun khat pawh a phuhru pha lo a ni a. Tunah phei chuan thal khawro kan hmachhawn mek a, power kan mamawh hi a sang leh sawt ang a, mahse kan state chhunga power kan siam chhuah ve hi chu a kiam sawt thung ang a, phai lam atanga power chawkluhna senso a sang sawt dawn tihna a ni.
Leiba kan ngahzia kan hria a, tuna kan leibat hi bat belh tawh miah lo pawhin rul ngar ngar ila, kum 50 vel hnuah kan rul zo thei chauh dawn niin chhut mite chuan an sawi a. Chutih laiin thawhchhuah nei mang lo kan nih avangin kum tin sum hi chu kan la puk belh zel dawn tih hi a chiang sa em em bawk si a, kan hmabak hi a ko ber ber hle a ni.
Hei hi kan dinhmun a nih tawh si chuan, inrelbawlna leh khawsak phungah hian theihtawpa kan inhrek a, inrenchemna lam hawia na taka kan kal thiam hi a pawimawh takzet dawn a. Inrenchemna atana pawimawh em em tur chu Ni zung chakna hman uar hi a ni dawn a ni.
Power inrenchemna atan ni zung chakna (renewable energy) hman uar a tulzia pawh sawrkarin a lo auchhuahpui tawh thin a, mahse rei lo teah a zuzi leh mai thin. Thawkkhat lai khan sawrkar office-in nizung chakna hmang uar rawh se tih thawm te kha a awm a, mahse a taka tihhlawhtlin a ni lo a niang, sawrkar office building chunga solar panel install hmuh tur a vang pharh mai.
Vankal Solar Park, 20 MW Projects kan sawi rikna pawh a rei leh ta hle, tun thlengin kan la chhawr tangkai lo niawm tak a ni. Inrenchemna lam hi kan bawh nat loh chuan, kum sawmnga vel lo awm leh tura ram luahtute phurrit hi a namen dawn lo a, hei hi tun atanga kan vei a pawimawh takzet a ni.