NICU-a kangmei chhuakah nau piang hlim pathum thi

Amravati, Maharashtra-a district hospital-a kangmei chhuakah nau piang hlim pathum an thi a. Kangmei hi neonatal unit-a ventilator puak atanga intan niin news agency ANI chuan a tar lang.
Chhiatna hi damdawi in chhawng thumna, Neonatal Intensive Care Unit (NICU)-a zing dar 03:30 vela thleng a ni.
Kangmei a chhuah veleh hian doctor, nurse leh thawktu dangten a awmte thiar sawn hna an thawk nghal a. Thawktute hian ward chhunga nausen eng emaw zat an chhanchhuak hman a. Unit-ah hian piang hlim 39 dah an ni a, paruk chu Divisional Referral Services Hospital-ah enkawl zui tura dah an ni.
Video thehdarhah chuan damdawi in ward hi a kang na hle tih a lang a, hmanruate chu a kang chhe vek a, a bangte pawh a dum nasa hle.
Police team-in an chhui nghal a, ventilator hi a puah chhan an la hre mai thei lo va. Nausen chhanchhuah takte dinhmun pawh chiang taka hriat vek theih a la ni lo bawk.
Maharashtra Revenue Minister Chandrashekhar Bawankule-a chuan chhiatna thleng pawi a tih thu leh chhui tura thu pek nghal a nih thu a sawi a. Ani hi Amravati guardian minister niin a tuartu chhungkuate chu sorkar atangin puihna pek an nih tur thu a sawi a. Thil thlengte chu a ngaihven reng tih a sawi bawk.
Amravati-a Congress MLA Sulbha Sanjay Khodke chuan fire audit tih a nih thu a sawi a. Electric kal sual nen inkaihhnawihna a nei thei tih sawiin, “Electrical system-ah engnge thleng chiang taka hriat a la ni lo va. Ventilator leh electrical system kaihhnawih a ni a. Chhui chian a nih hnuah a hriat chauh vang,” a ti.
Hetiang deuh bawk hian Inrinni khan Chhindwara District Hospital, Madhya Pradesh-a NICU-ah kengmei chhuakin nau piang hlim pathumin hliam an lotuar tawh bawk.