NIFAA-in Life Saver Award hlan
National Integrated Forum of Artists & Activists (NIFAA) chuan Ningani khan Aizawlah ‘International Life Saver Award’ hlanna inkhawm an buatsaih.
He hun hmanpuitu Health minister Dr R Lalthangliana chuan thisen tel loin mihring a dam theih loh a, a mamawhtuten a hun taka thisen an dawn theihna’na hma la thin NIFAA rawngbawlna leh inpekna a fakawm tih a sawi. Covid-19 len vanga harsatna tam tak tawh a nih laia midangte nun chhanhim tura NIFAA-in thisen pek runpui a huaihawt avangin mi tamtakin damna an chang a, an hnathawh chu India khua leh tui chauh niloin khawvelin a hriatpui a, Guiness Book of Record-ah NIFAA hming a chuan phah tih a sawi bawk.
“Thisen pek kawngah Mizote hming a tha hle a; hei hi mipui, kohhran, tlawmngai pawl leh zirlaite inpekna vang a ni. Thisen pe thei tur chuan hrisel tha nih a ngai a, hriselna ngaihpawimawh a, ei leh in uluk a, khawsak phung hrisel zawk nei thei turin mitinin tan kan lak a ngai a ni,” a ti.
NIFAA founding chairman Pritpal Singh Pannu chuan kum 2021 khan India ram zalenna sualtu martar pathum – Bhagat Singh, Rajguru leh Sughdev te hriatreng nan Samvedna ‘Blood and Plasma Donation’ India ram huapa huaihawt niin, thisen unit 90000 pek a nih avangin ‘World Book of Records’ London-ah NIFAA hming a chuang tih a sawi a. ‘Guiness World Record’ vawi 6 an siam tawh tih a sawi.
International Life Saver Award hi NIFAA Chapter hrang hrangah sem thin niin, mimal leh pawl hnenah pek thin a ni a. Tun tuma he lawmman dawngtute chu: ECM KTP Hqrs. Siaha, NSS Unit PU College, Students’ Union Govt. Serchhip College, NIFAA Siaha District, NIFAA Mamit District, JJ Cultural Club N. Vanlaiphai, Dr Zoramdinthara, Alex Zosangliana, Jacinta Vanlalengzami leh Esther Hnamte te an ni.
NIFAA Super Human Award chu H. Rotluanga hnenah pek niin, Esther Hnamte-in NIFAA Superstar Kid Award a dawng bawk.
NIFAA-in Life Saver Award hlan
Get real time updates directly on you device, subscribe now.
Prev Post