Nigeria-ah inkhawm lai mi 13 ruk bo an ni leh ta

Nigeria-ah inkhawm lai mi 13 ruk bo an ni leh ta
Tun hnaia a vawi hnih nan Nigeria lailia Kogi state-ah biak ina inkhawm lai mi 13 chu mi sualten ralthuam nen an ru bo leh.
Mi sualte hian thingtlang lo neitute tamna, Aaaaz-Kiri district-a Evangelical Church Winning All chu Pathianni tuk inkhawm laia luhchilhin silai an hmet puak a, inkhawm lai mi thenkhat an hruai bo zui a ni.
Kogi Information Commissioner Kingley Fanwo-a chuan mi sual zinga panga chu thah an nih ve thu a sawi a; mahse, mi dang eng emaw zat an relh bo hman a, hliam tuar pawh an awm nual thu a sawi.
Thuneitute chuan mi ru botute hi tual chhung miten an sawi dan angin ‘bandit’ tiin an sawi a, heng mite hi tlanna sum duh vanga mi ru bo thin an ni.
Chawlhkar hnih lek liam taah khan a bul lawka Ejiba khuaah biak ina inkhawm lai luhchilhin pastor, a nupui leh an kohhran mi eng emaw zat ruk bo an lo ni tawh bawk.
Heng mite hi venhim hna thawktu pawl hrang hrangin chhanchhuah tumin bei mek zel mah se tumah chhuak an la awm lo niin tual chhung miten an sawi.
“Thenawma Niger leh Kwara state-ah venhim hna thawktute an chet nat avangin bandit-te hi Kogi state-ah an rawn insuan a ni,” tiin Fanwo-a chuan BBC a hrilh.
Tun hnaia heng thil thleng hian Nigeria him lohzia a tar lang nia ngaih a ni a, a bik takin mi sual pawlten tum khata mi thahnem tak tak an ruk bo te, khua leh biak in beia pawi lian tak tak an khawihna thlen tamna, an ram hmarthlang leh ram lailiah himna a derthawng zual hle.
Tun hnaia inruk bona thleng zingah November thla tawpa PNiger state, Papiri khuaa St Mary’s Catholic School-a zirlai 250 chuang leh thawktu 12 ruk bo kha mi ruk bo tam ber tum a ni.
Nigerian sorkar chuan heng thil thlengah hian jihadist pawl, Boko Haram leh Islamic State in West Africa Province (Iswap) chu a tituah an puh ber a; mahse, mi thiam thenkhat chuan an tih ni vek bik lovin heng pawla tel lo, mi sual tangrual pangngai pawh an ni tih an sawi.
Tun hnaiah President Bola Tinubu-a chuan venhim hna thawhnaa hotu liante chu inruk bona thleng thin a tawp theih nan hnuchhui hna nena tanga beihpui thlak turin a ti a, mi sual chet tam zualna hmunah sipai leh police tam zawk dahna tur a pawm bawk.
Thuneitute chuan sipai leh police task force tangrualin beihpui an thlaknaah pawl eng emaw zat chu an tukdawl niin an sawi a. Hetih lai hian pawi khawihna erawh a la awm reng a, a bikin thingtlang kilkhawr, venhimna a panna lai leh venhim hna thawktuten an hriat pawha an thlen zung zung lohna turah a la tam zual.