Nikum aiin kumin Pro Fight-ah boxer an tlem!

Nikum aiin kumin Pro Fight-ah boxer an tlem!
Nimin khan Zudio LPS Pro Fight-a tel tur boxer-te LPS Arena, Falkland-ah an hriselna endik hmasak an nih hnuin tel thei turin boxer 280 an inbuk fel a, entry form thehlut atangin mi 40 chuang an inlan lo a, organising committee-in nikum aia tam an tel ngei beisei mah se pakhatin tun tumah an tlem zawk a ni.
Champion tawh HC Lalramfela, C. Lalduhawma leh Lalrinngheta nen Zudio LPS Pro Fight-ah a tir atangin boxer 280 an tel dawn a, Ningani hian LPS Office, Zarkawtah fixture tarchhuah a ni ang.
Kumin hian boxing khel ngai lo leh vawikhat telna kum dang aiin an tlem bawk a, tunlaia Mizo boxer tha leh beiseiawm, Pro Fight-a la inlan ngai lo engemawzat an inlan dawn a, inhnek hmuhnawm leh inelna sang lehzual a nih ngei a buatsaihtute chuan an beisei.
Weight hrang pang zingah fly-a tel an tam ber a, NT Lalbiakkima kalsan champion kawnghren rochun tumin boxer 89 an inbuk a; bantam champion lai Laldinsanga title chhuhsak tumin boxer 66 an inziaklut ve thung.
Light-ah champion thar nih tumin mi 65 an tel a, welter champion Lalruatzela Hauzel cho theitu nih tumin mi 37 an inel dawn a; weight hrang panga zinga tel an tlemna ber middle-ah C. Lalhruaitluanga kut atanga champion kawnghren chhuhsak tumin boxer 23 an inbuk.
Pro Fight chanchina weight hrang pathuma champion hmasa ber nih tumin Ramfela’n light title kalsanin welter-ah chona thar a hmachhawn dawn a; middle title lakkir leh tumin kum 2019 champion Duhawma a tel bawk a, kum nga hnua Pro Fight-a a inlan leh hmasak ber tur a ni nghal dawn.
Kum 2022 bantam champion Rinngheta’n nikum ang bawkin light title a chuh leh dawn a, kum kalta khan title kalsanin weight rit zawkah a insawn a, semi-final a paltlang zo ta lo a ni.
Kum kalta Title Fight-a chak zo ta lo Ramdinthara, Lalhruaitluanga, Vanlalenkawltira leh Lalthanliana Junior-te inbuk zingah an tel a; Mizoram chhung bakah Myanmar, Manipur, Meghalaya leh Assam atangin boxer an rawn tel.
Ninganiah fixture tichhuakin Zirtawpni zan dar 8-ah LPS Arena, Falkland-ah an inhnek tan dawn a; a hawnnaah hian khuallian turin sports secretary Lalramsanga Sailo beisei a ni a, Mizoram State Sports Council hnuaia state level association 33 office bearer-te sawm an ni bawk.
Biakkima tel lo Pro Fight!
Zudio LPS Pro Fight 2024-ah flyweight champion lai NT Lalbiakkima’n title a humhim dawn lo tih inbuk hma khan a tichiang.
Pro Fight chanchina boxer hlawhtling ber leh vawiruk champion thei Biakkima chuan mimal thilah harsatna a neih avangin a inbuatsaih thei lo tih a sawi a, ‘Ka duh tawk rih mai ang’ tiin a tel dawn lo tih a sawi.
Nikum title fight-ah split decision-in Vanlalenkawltira a hneh a, hemi hnu hian Biakkima a inhnek zui tawh lo. A tel dawn loh avangin flyweight-ah champion thar an awm dawn tih a chiang nghal.
Light champion lai HC Lalramfela pawhin title kalsanin welterweight-ah insawn tumin a inbuk dawn.
Boxer 320 chuang tel tuma entry form thehlut zingah 280-te chu Thawhtanni zing dar 8 atanga chhun dar 12 thleng khan an inbuk a, san zawng leh hlam thui zawng teh nghal a ni.
Champion lai pathum – Laldinsanga (bantam), Lalruatzela Hauzel (welter) leh C. Lalhruaitluanga (middle) erawh an inbuk ve rih dawn lo a, anmahni cho thei tur lo nghakin boxrec-a ziahluh tur title fight dawnah an inbuk chauh ang.
A hawnnaah hian Youth Icon Lalsangliana a zai dawn a, man chawi loin a hmunah a duh tan chhim theih a ni ang.
Pro Fight vawi 11-naah hian quarter-final atanga title fight thlengin lawmman pawisa fai Rs. 6,50,000 semchhuah a nih dawn bakah KT Enterprise-in boxer, referee leh jugde thlanchhuahte tan lawmman tha tawk a pe ang a, inhnek zan apiangin GIG Motors Fighter of the Night thlan a ni bawk ang.