NITI Aayog Council thukhawm CM-in Mizoram mamawh thlen

NITI Aayog Council thukhawm
CM-in Mizoram mamawh thlen
NITI Aayog Governing Council chu Inrinni khan New Delhi-ah an thukhawm a, Mizoram chief minister Zoramthanga chuan state dinhmun sawi pahin mamawh a thlen.
NITI Aayog chairman, Prime minister Narendra Modi kaihruai he thutkhawmah hian Mizoram CM chuan Sustainable Development Goals Index 3.0 ranking chhuah hnuhnun berah state hma la tha 15 zingah Mizoram chu 12-na a nih thu te, SDG hlawhtlin tehna atana local indicator framework hmanga village legal local level-a hma la hmasa ber state zing ami a nih thu leh, hemi kaihhnawihah hian Ngopa Village Council chu Best Gram Panchayat Award in 2023 pek a nih thu a sawi.
Mipui hmathatna tur, a bikin mahni kutkawiha eizawngte puiha tihhmasawnna’n state flagship programme SEDP kalpui a ni tih a sawi a. An eizawnna chawisan a, an sum lakluh a tam zawkna’n trade 52-ah incentive pek a ni tih a sawi a ni.
Chief minister chuan state hmasawnna atan hmasawnna ruhrel lian din ngaihpawimawh a nih thu leh, inkalpawhna lam – rel kawng, national highway leh a dangte chuan sumdawnna leh a kaihhnawih dangah hmasawnna a thlen tel zel tur thu a sawi a. Hmasawnna ruhrel daihrei tur dinna atana sawrkar laipuiin SASCI scheme a duang chu lawmawm a tih thu a sawi. State ten tangkai zawka kan hman leh theihnan he scheme hnuai part-I a kaihhruaina inziak thenkhat chu a aia khirh lo zawka siamthat nise, tiin rawtna a thlen a. Sawrkar laipui scheme thenkhat hnuaiah land acquisition atan a hranpaa sum dah a nih loh avanga harsatna awm thin chu sutkian nise a tih thu a thlen bawk.
Sawrkar hmalakna leh bultum ngawr ngawr chuan hmasawnna hna zawng zawng a thawh theih vek loh avangin private investment uar tura hma lak a ni tih pawh sawiin, Mizoram chuan Ministry of DoNER-in North East Global Investors’ Summit a kalpui mek ah pawh phur taka hma a lakpui thu a sawi.
State chhunga healthcare infrastructure-in duhthu la sam tawk lo mah se, Mizoram chuan naupang zah za Rotavirus hri danna a pek tawh thu leh, ramchhunga infant mortality rate hniam ber a nih thu te; Lawngtlai Siaha, Serchhip leh Mamit District Hospital chu tihchangtluna thuamthat mamawh a nih dan te, Community Health Centre-te chu First Referral Unit ni tura tih chak a pawimawhna te a thlen a ni.
Hmeichhiate dinhmun chawikan kawnga Mizoramin hma a sawn dan Zoramthanga hian sawiin, district tina Working Women Hostel sakna atana sum mamawhna te, sumdawng hmeichhiaten an hman tangkai tur nau enkawlna (creche) siam a tul thu te a sawi.
Mahni sahimna zawnga Mizorama raltlante dinhmun leh state sawrkar leh mipuiin an lo dawnsawn dan te a sawi bawk.
Kumin NITI Aayog Governing Council thutkhawm thupui chu ‘Viksit Bharat @2047: Role of Team India’ tih a ni a.
Chief minister hi chief secretary Dr Renu Sharma chuan a tawiawm a ni.