Thawhtannia tennis ranking thar tarchhuahah Novak Djokovic chuan mipa world number one dinhmun luahkir lehin, chawlhkar 377 chhung hmeichhe number one ni tling chunga chawl tawh Steffi Graf-i’n hmeichhia leh mipa sawi loa a chawlhkar zawnga world number one ni rei ber record a lo siam tawh kha tunkar atang hian a nihrualpui chho tan chiah.
Nikumah hripui laka in-venna a lak duh loh avangin Australian Open title a kawl lai humhim turin Melbourne khuaah grand slam tournament a khelh ve phalsak a ni lo a, kuminah Australia sawrkar a inthlahdul ta a, Serbian super-star pawh chuan harsatna nei loin January thla khan Mel-bourne Park-ah tournament a khel thei ta a, Australian Open title la kirlehin, chu chuan a tawlhchhuahsan tawh men’s ranking-a world number one dinhmun a luahkirtir leh ta a, No. 1 nih rei kawngah record ding lai a nihrualpui ta hial a ni.
Kum 35 mi Serb hian a vawikhatna atan March 2021 khan men’s world number one dinhmun a luah tan a, kum 1987 atanga women’s ranking ler luah tan German nu rothap Graf-i record hial a tluk chho ta a ni.
Djokovic leh Graf hi tum 22 ve ve Grand Slam champion ni tling an ni a; a tumkhatna’na world number one a nih hnu khan Graf chuan chawlhkar 186 teh meuh chhung a zawnin ranking ler a luah a; chu chu women’s record ni rengin, kum 2016 khan Serena Williams chuan a rawn nihrualpui ve a ni.
A zawna Djokovic No. 1 a nih rei ber tum chu July 2014 leh November 2016 inkara chawlhkar 122 chhung a awh kha niin, mipa lam record erawh a pha lo viau a, a tluklohte chu Roger Federer (237 weeks), Jimmy Connors (160) leh Ivan Lendl (157)-te an ni.
Tun hi thlaruk hnua Novak Djokovic-a’n world number one din-hmun a luah leh vawikhatna niin, point 7,070 a hum mek a, amah hnaihbertu Spaniard Carlos Alcaraz lakah point 590 chuangin a sang.
Men’s world ranking hi kum 1973 atanga tihtan niin, kum hnih hnuah women’s ranking an kalpui ve leh a ni.
No. 1 nih rei kawnga Graf tluktu Novak
Get real time updates directly on you device, subscribe now.
Prev Post
Next Post