Mayor’s Cup final lut Ward VII

Gilbert Lalbiaksanga’n minute 120 hnuah penalty chhuihlutin Thawhlehni zanah Ward VII chuan 2-1-in Ward IV an hneh a, AMC Mayor’s Cup final an lut.
Rajiv Gandi Stadium, Mualpuiah Vanlalthlamuana goal thun hmangin Ward 4-nain hma an hruai a, Fredy Lalrinchhana’n Ward VII-na si phurh sutin goal khat ve ve inpein hun pangngai an hmang zo.
Minute 30 hun pekbelh an khelh hnuah minute thum dang pekbelh leh a ni a, minute 123-ah inhnial theih takin Ramhlun South, Ramthar, Ramthar North leh Aizawl Venglai awm-khawmna team-in penalty an chawi a, Gilbert-a’n khungin, penalty pet hmanga a chak zawn pumpelhin Zemabawk, Zemabawk North, Falkland leh |huampui tel khawmna team-in Zirtawpni zan final-ah Ward XII leh XVIII inkhela chak zawk an hmachhawn dawn a ni.
Semi-final an paltlang theihna goal hlu tak thuntu Gilbert-a’n Tata Yodha man of the match lawmman a dawng a; Ward IV-na coach HC Zar-zoliana’n uiawm taka an tlak hnuah player an inhliam nasat avangin harsatna an tawk tih a sawi a, minute 120 chhung mar tha taka khel thei Ward VII-nain chak an phu zawk nia a hriat thu a sawi bawk.
Ward IV-nain beiseiawm takin bul an tan a, minute 19-ah Francis Vanlaldika’n ball vawrhlutin Thla-muana’n goal lamah tauh nghal a, keeper Lalchhanhima tlanchhuakin a dang per na a, Thlamuana’n um zuiin awlsam takin goal-ah a pet lut a ni.
Minute 75-ah Lalruatfela ball pek a lak rem hnuah Fredy-a’n goal-ah a pet a, Ward lina goal-veng Lal-awmpuia’n dansak mah se chang zui lehin, fing takin an si phurh sutna’n a chhuih lut a ni.
Hun pekbelh minute 30 dang an khelh hnuah Ward VII-nain an nawr hneh a, hun a tawp hma chiahin Fredy-a’n Ruatfela corner pet tauhin, C. Lalrintluanga’n a kutin a dang kawi a, referee Lalduhthlani’n huaisen taka thutlukna siamin penalty a chawiti.
Gilbert-a’n dinglamah petin, Awpa’n zuan dik mah se a nam chhuak zo lo a, hlim takin Ward VII-nain hnehna an lawm zui ta a ni.