No. 1 thar tur Djokovic
Kum khat chhunga Grand Slam khelh hnuhnung ber US Open chu thawhtan zan atang khan khelh tan a ni. World No. 2 ni mek Novak Djokovic chuan thawhtan zing khan a khingpui Alexandre Muller chu awlsam takin a hneh. Djokovic hian US Open zawh ruala ranking thar tihchhuah turah No. 1 ni tura a mamawh point a hlawhchhuak fel a, Carlos Alcaraz thlakin, World No. 1 a ni dawn. Djokovic chak rual hian Thiem leh Tsitsipas ten hnehna an chang a. Rawlthar beiseiawm zinga mi Holger Rune erawh first round paltlang zo lovin a tla thung.
Djokovic-a’n bul a tan tha
Covid 19 hri danna a lak loh vanga kum hnih chhung ngawt USA-a zin thei lo Novak Djokovic chuan kum hnih hnuah US Open a hmachhawn ve leh thei ta a. Vawi thum a champion tawhna hmunah tha zetin bul a tan a, a khingpui Muller a sawp nghal.
US Open khelh hmaa inelna hnuhnung Cincinatti Open-a champion Djokovic hian a khingpui Muller lakah bul a tan tha viau a, set khatnaah game zawng zawng la fai vekin, awlsam zetin set a la nghal. Awlsam taka set khatna a lak hnuin set hnihnaah break a nei zui leh nghal a, bul a tan tha zui leh.Game a thunun zui hnuin a khingpui Muller hian a serve humin, game a la ve teh mial a. Game a lak vawi khatna hian champion tluk hialin a tilawm a, a celebrate hial nghe nghe. Muller hian game hni la ve bawk mahse Serb hian awlsam takin set hnihna a la zui leh tho thung.
Set hmasa pahnihah che chhe viau mah se set thumnaah Muller a insiamtha a, hmuhnawm takin a inlan. A serve a hum bakah break a nei ve ta hial a, nuam ti takin a inlan ve thei tawh. A khingpui khel tha tulh tulh mah se Djokovic a khel chhia in, a zam thut bik chuang hauh lo va, Nole hian game thum hloh chungin set a la zui leh a. World No. 84 Alexandre Muller lakah 6-0, 6-2, 6-3 a chakin second round a lut.
Grand Slam-ah vawi 23 zet champion tawh Novak Djokovic hian ATP Wolrd Ranking-ah a chunga awm mek Carlos Alcaraz lehpel turin point 21 chiah a mamawh a. US Open first round-ah Muller a hneh vangin point 45 a hmuh belh a, No. 1 ni tura a mamawh point a hlawhchhuak fel nghal der. Tun dinhmunah Djokovic hian point 24 in Carlos Alcaraz a tlan pel tawh a. US Open-ah hian a thlen san poh leh Alcaraz nen an inkar a zau ting mai dawn. Alcaraz hian champion lai a nihna US Open-ah hian ranking point hmuh belh tur a nei lo va, a tlak hma phei chuan a point neih mek atangin paih tur a tam zel dawn thung. Djokovic hi US Open 2023-ah a champion hlauh a nih chuan Alcaraz nen an inkar a zau leh zual dawn a, No. 1 ni chunga kum khar theihna hun tha a neih theih phah ang.
Thiem leh Tsitsipas te an chak
Hliamin a tihbuai hnua ngaiawh phak tawh lo, Grand Slam a khelh hnuhnung vawi ruka first round paltlang zo lo vek Dominic Thiem chuan US Open-ah tha takin bul a tan a, Alexander Bullik lakah set hloh lovin a chak.
Grand Slam champion hlui Thiem hian a khingpui Bullik lakah tha takin bul a tan a, break a neih chhawr tangkaiin, harsa lo takin set khatna a la. Set khatna a lak hnuin awlsam zual zawkin set hnihna a la a. Set thumnaah inkhel harsa zawk hmachhawn mah se break a neih chhawr tangkaiin set a la zui leh a, 6-3 6-2 6-4 a chakin second round a lut. Second round-ah Ben Shelton a hmachhawn zui leh ang.
US Open 2023-ah pahnihna Casper Ruud pawhin hnehna nen bul a tan. Ruud hian American qualifier Emilio Nava lakah inkhel harsa tak a hmachhawn a, set khat a hloh hial. Grand Slam-ah vawi thum final lut tawh Ruud hian Nava lakah tie-break hmangin set khatna a la a. Set hnihnaah a serve a hum zawh loh vangin set a hloh ve thung. Set thumnaah break a neih chhawr tangkaiin set a la a, tie-break hmangin set lina a la zui leh bawk a, 7-6 (7-5) 3-6 6-4 7-6 (7-5) a hnehna changin inkhel hautak a paltlang zui ta a ni.
Champion tura rinkai zinga mi Stefanos Tsitsipas chuan a khingpui Milos Raonic chu 6-2 6-3 6-4 in a hneh a. Fritz pawhin a khingpui Steve Johnson chu 6-2 6-1 6-2 a hnehin second round a lut ve bawk.
Rune a tla
Mipa lamah player langsar an chak sup sup laiin rawlthar beiseiawm ber zinga mi Holger Rune erawh first round paltlang zo lovin a tla ve thung.
Denmark rawlthar Rune hian world number 63 Roberto Carballes Baena a hmachhawn a, set khat la ve bawk mah se chhe takin a inlan zui a. A thlen san ngai lohna US Open chu Baena lakah 6-3 4-6 6-3 6-2-a a tlawm vangin a mangtha leh ta a ni.