Nobel Prize nominate 305 lai awm tawh

Kumin Nobel Peace Prize dawng thei turin hming 305 pek luh a nih thu Nobel Institute cbuan a sawi a. Mahse, heng hming te hi sawi lan a la ni lo.
Kum 2016 khan hming pek luh tam ber tum niin 376 lai pek luh a ni a, chung zingah 212 chu mimal niin pawl 93 an tel bawk niin Oslo-based institution te chuan an tarlang.
Nobel statutes angin heng Nobel Prize dawng thei turte hming theh luh te hi kum 50 chhung thup tlat tur a ni bawk a.
Nominate siam thei zingah laureates hlui te, ram tina lawmakers leh cabinet minister te bakah university professor thenkahtte pawh an tel a, heng mi tena Nobel dawng thei tura an chhawpchhuahte erawh an duh chuan an tarlan a thiang thung.
Nikum ang bawkin kumin hian dawng thei tura chhawp chhuah zingah Russian President Vladimir Putin hmelma lian leh dodaltu te bakah Ukraine indona kaihhnawiha hming lang te an langsar a.
Chung zingah chuan Ukrainian President Volodymyr Zelensky te, Turkish president Recep Tayyip Erdogan, NATO chief Jens Stoltenberg leh Ukrainian group international war crimes tribunal din tumte pawh an tel.
Anni bakah hian nominate tarchhuah zingah Putin a hmelma- anti-corruption activist Alexei Navalny, tur hmanga hraia dam chhuak leh te bakah journalist leh political activist Vladimir Kara-Murza leh pro-democracy youth movement Vesna te pawh an tel.
Kumina dawng thei tur list zingah climate activists Greta Thunberg of Sweden leh Vanessa Nakate of Uganda te, Iranian women’s activist Masih Alinejad leh a anti-hijab movement My Stealthy Freedom bakah Salvation Army te pawh an tel.
Chinese leh Hong Kong pro-democracy activists te pawhin Chow Hang-tung, Peng Lifa, group Uyghur Tribunal te pawh an nominate zingah a tel a, heng bakah hian Myanmar ambassador to UN Kyaw Moe Tun – sipai sorkarin a nihna a hlihsak tak pawh telin, Cairo slum-a miretheite tana thawk nasa Maggie Cobran pawh nominate zingah a tel.
Nikum khan Nobel Peace Prize chu Russian human rights group Memorial, Ukraine’s Center for Civil Liberties (CCL) leh Jail-a tâng mek Belarusian rights advocate Ales Bialiatski te chuan an dawng a ni.