North East-a Ultraviolette SpaceStation hmasaber Aizawl-ah hawng

North East-a Ultraviolette SpaceStation hmasaber Aizawl-ah hawng
India-a electric motorcycle siam lama hmahruaitu Ultraviolette kutchhuak zawrhna hmun Ultraviolette SpaceStation chu Ramhlun North, Aizawl-ah C Lalruaia, Secretary Transport Department-in Zirtawpni kalta khan a hawng a, “Electric motorcycle hralh theihna tur khuh hawn a ni ta hi a lawmawm a, mipuiin intihhmuhin lei zel se ka duh hle a ni,” a ti. Aizawl-a SpaceStation hi NorthEast India-a a hmasa ber a ni.
Internal combusation engine (ICE), petrol leh diesel hmang lirthei meikhu chhuahin boruak a tichhiat nasat mai bakah tuialhthei renchem a nih theih nan India leh Mizoramin tuialhthei hmang lova lirthei siam chhuah a ngai pawimawh niin SpaceStation hawngtu chuan a sawi a, kum 20 lo awm leh turah Mizorama lirthei hralh chhuah 10% tal electric a nih theih nan sorkarin hma a la a, Mizoram Electric Vehicle Policy 2024 duan fel tawh niin a sawi bawk.
Electric startup Ultraviolette Automative hi 2016 khan Narayan Subramaniam leh Niraj Rajmohan ten Bangalore-ah dinin, electric lirthei tha leh rintlak siam chhuah tumin hma an la a, 2019 khan an electric motorcycle hmasa ber F77 phochhuakin ngaihven a hlawh hle a, 2022 atangin an hralh chhuak tan ta a ni.
Bike chak, changkang leh battery rintlak siam chhuah kawngah an insawrbing a, India ramah boruak an neih len viau bakah Europe-ah a tha tawk a ni tih finfiahna an kalpui nasa a, F77 chauh ni lovin October 2025 atanga an hralh chhuah X47-in fak a hlawh hle bawk.
Business Head Gajanan Umarekar chuan, motorcycle an siam chhuahte Europe ram hrang 10-ah an thawn chhuak tawh tih sawiin India ramah Mizoram chu SpaceStation 43 an hawnna leh hmar chhak state zinga hmasa ber a ni a, London leh Amsterdam khawpuia an hralh ang chiah Mizoramah an zuar chhuak, tih a sawi.
Gajanan hian kum sarih, kum riat vel an zirchian hnuah chauh lirthei an siam chhuak tih a sawi a, Mizorama a vawi khat kalna chauh ni mah se an bike siam chhuahte chu Mizote duh chi a ni a, SpaceStation bunna tur hmun dik tak a nih avangin an hlawhtling ngei dawn tih a hriat nghal thu a sawi bawk.
Mizorama Ultraviolette la luttu MSS Motors-in tun dinhmunah bike chi hnih X47 leh F77 an zuar a, showroom an hawn rualin pathum an hralh nghal thei dawn tih an sawi.
Mizorama an hralh theih ber tura ngaih Tessact erawh an tlangzarh hman rih lo a, Ultraviolette-in electric scooter an siam hmasak ber hi pho chhuah a ni tawh a, mi 70,000-in an hauh lawk nghal. Kumin kum laihawla hralh chhuah hman an tum laiin rintlak leh tha zawka thuam an duh avangin January 2027 atanga hralh chhuah turin ruahmanna an siam a ni.
MSS MOTORS ULTRAVIOLETTE SPACESTATION

X47 Original (on-road price)
cosmic blck : Rs 3,09,748
stellar white : Rs 3,03,903

X47 Recon+ (on-road price)
turbo red : Rs 4,70,986

X47 Desert Wing (on-road price)
sandstorm : Rs 5,11,774

F77 Mach 2 (on-road price)
turbo red : Rs 4,72,517
supersonic silver : Rs 4,63,329

F77 Super Street (on-road price)
afterburn yellow : Rs 3,76,822

F77 Super Street Recon (on-road price)
afterburn yellow : Rs 4,78,810