Norway in World Cup an hnaih

November 13, Ningani zan khan Europe khawmual atanga World Cup 2026 khel tur zawnna khelh chhunzawm a ni a. 4-1 ngawta Estonia hnehtu Norway chu World Cup khel turin an tling chiang thawkhat a, tling chiang tak zet turin Pathianni zan an nghah thlen phawt a ngai dawn thung. Norway chak rual hian Italy pawhin hnehna an chang ve bawk a, Italy hi Norway chelh khaw tlai hlektu chu an ni.
Group I-ah vawi ruk khel tawha la chak vek Norway hian Ullevaal Stadion-ah Estonia an mikhual. An mualah chak a nih chuan World Cup khel turin an tling tawh mai dawn a, an mualah chak pawh an tum hle. An mualah khel tha viau mah se chawlhlawk hmain goal an thun thei bik lo thung a, goal awm lovin chawlhlawk an hmang phawt.
Chawlhlawk hnu lamah erawh Estonia tan Norway chu dan mi rual an ni tawh lova, goal li ngawt an chhuah. Norway tan hian Alexander Sørloth chuan minute 50-naah hmahruaina goal a thun. Hmahruaina goal an thun vangin an phur viau a, goal pawh an thun belh leh thuai. Hmahruaina goal thuntu Sorloth chuan goal a thun atanga minute hnih hnu lekah an goal hnihna a thun zui leh zat a, an hmahruaina a tizau.
Alexander Sørloth-a’n goal hnih a thun hnuin season kal meka chetha, goal thun reng mai Erling Haaland a inlar zui ve leh a, Haaland hian minute 56 leh 62-ahte goal thunin goal hnih a rawn thun ve leh. Haaland hian season kal meka inelna hrang hrangah goal 30 zet a thun tling tawh a, a chetha tluang hle. Goal thun thulh hleithei lo Haaland hian Norway tan goal 53 a thun tling der tawh a, goal 53 thun tling turin game 47 chiah a mamawh a, hei hian goal thun thei bik a nihzia a tilang chiang hle.
4-0 ngawta an hnufual hnuin Estonia tan hian Robi Saarma chuan minute 64-naah goal thunin an si phurh a sut then. An si phurh sut then bawk mah se hun tawp thlengin goal dang a luh belh thei tawh lova, Norway chuan an mualah hnehna pawimawh tak changin World Cup khel tura an mamawh point an hlawhchhuak.
Group I a inkhel dangah pahnihnaah awm a, Norway elpui ber Italy chuan mikhual an nihna hmunah 2-0 in mualneitu Moldova an hneh. World Cup-ah vawi li champion tawh Italy hian chak mamawh tak chungin goal an thun har hle a, Gianluca Mancini chuan minute 88-naah hmahruaina goal a thun chauh. Hun tawp dawn tepa goal an thun hnuin Pio Esposito chuan minute 90’+2-naah an goal hnihna thunin an chakna a nemnghet zui ve leh bawk.
Norway an tling tawh
Group I-ah hian vawi sarih chak zawnin Norway hian point 21 an hmu a, Italy lakah point thumin hma an hruai fal mek. Norway leh Italy te hi Pathianni zanah an inkhel chhunzawm dawn nghe nghe. Pathianni zanah lo chak lo tehreng pawh ni se Norway hi goal difference-ah an tha fal em em a, Italy aia an that zawkna hi +17 zet a ni. Heti a nih vang hian Italy hi lo hneh lo tehreng pawh ni se 18-0 ngawta an tlawm a nih ngawt loh chuan Group champion an ni dawn tho tho. An inkhel hmasak zawkah Italy hi an lo hneh tawh nghe nghe a, an inkhelh leh hunah si 18 fai ngawta chak loh chu thil theih loh ang hial a ni. Hei hi Norway dinhmun chu a ni a, kum 28 zet hnuah World Cup khel turin an tling chiang tawh tih a sawi ngam.
Football ram ropui Italy hi World Cup vawi hnih an khel phak lo zawn tawh a, a zawna vawi thum khel thei lo dinhmunah an ding mek. Tuna an dinhmunah chuan group champion an ni zo dawn lo ngei niin a lang a, play-off an khelh a ngai dawn. Play-off ah vanduai ve palh thei an ni a, World Cup-ah Italy kan hmu ngei ang em tih a la chiang lo.