NSA Doval-a leh Bangladeshi NSA inkawm dawn

NSA Doval-a leh Bangladeshi NSA inkawm dawn
Ram pahnih inkara khi a awm mek karah Indian National Security Adviser Ajit Doval-a chuan tun kar hian Bangladeshi National Security Adviser Khalilur Rahman-a chu New Delhi-a a hmu dawn.
Rahman-a hian Nilaini leh Ningania India-in Colombo Security Conclave-ah Bangladesh palai zinga telin Delhi a tlawh dawn a ni.
Rahman-a’n India a tlawh tur hi an ram hnih inkara thawhhona leh himna thila India leh Bangladesh indawrnaah thil pawimawh leh hmasawnna thlen thei tura ngaih a ni a. Dhaka-a sorkar lailawk ding mek hian a chhehvel ramte nena inkawmngeih chu a dah pawimawh zinga mi a ni a, Rahman-a’n Indian sorkara mi pawimawh a kawm tur hian rah tha a chhuah beisei a ni.
Colombo Security Conclave hi Doval-a kaihhruai tur niin Maldives, Mauritius leh Sri Lanka-a NSA tlukpui nihna neite an tel dawn a. Tuipuia himna a awm theihna tura inzirtirna leh thawhhona tha a awm theihna tur te, firfiaka chetna beih let leh chhiatna a lo thlena tangruala chet chhuah dan tur te an sawiho dawn a. Heng thilte hi heng lai ram bawra himna atana pawimawh tling a ni.
Conclave-a tel tura Bangladeshi sorkar mi pawimawhin India a tlawha inbiakna neih tur hi nikum August thlaa zirlai kaihhruaia lungawi lohna lantira Prime Minister Sheikh Hasina-i paih thlak hnu leh India-a a tlanchhiat hnua India-Bangladesh inkar chhe zui taah a pawimawh ngei beisei a ni.
Bangladesh hian prime minister an paih thlak tak, Hasina-i hi an ramah thubuai tam tak siamsakin India hi thawn let turin an phut a, Delhi-in chhanna mumal a la pe lo thung a. Hetih lai hian Hasina-i paih thlak hnua sorkar lailawk ding mek chu India hian sakhua leh hnam tlem zawk, a bikin Hindu-te laka tihduhdahna thleng thinah hma la tha tawk lo leh hum ngam lovah a puh mek bawk a ni.