NTUM-in ESI hmang turin hnathawk chhawrtute phut

Mi hnuaia thawkten a chhawrtute atanga hamthatna leh thlahimna an dawn ve theihna tur Employees State Insurance (ESI) Act chu danin a phut anga hman ve an phut tih National Trade Union of Mizoram chuan an sawi.
Kuthnathawktute dinhmun chawisanna leh hmasawnna atana thawktu – National Trade Union of Mizoram (NTUM) hruaitute chuan sawrkar hnuaia muster roll-a thawk mi 8000 chuang chu an hmalaknain kum 2020 khan provisional employee-a hlankai an ni a. Muster roll/ casual hlawh pun na’na cabinet meeting-in Minimum Wages Act 1948 ennawnna a pass bakah notification a tichhuak chu lawmawm an tih thu an sawi. Sawrkar record ang chuan tunah MR hi 3365 an la awm mek a, provisional employee an nih ve theihna’n sawrkara dil mek leh bawhzui a ni tih an sawi bawk.
Cabinet-in a pass zingah sumdawngte hnuaia thawkte hlawh hniam ber tur, minimum wages zat tuksakna – The Shop and Establishment Act hnuai ami pawh a tel thu leh hei erawh notification chhuah a la ni ve loh thu NTUM hruaitute hian sawiin, MR/ casual a thawkte chu Labour Law hnuaia awm an nih avangin ESI Act 1948 chu damlo inenkawlna atan hmang ve turin thuneitute an ngen tih an sawi a. Private hnuaia thawktute tan pawh damlo inenkawlna atan ESI scheme hman sak turin an phut tih an sawi a ni.
He dan hnuaiah hian sumdawnna engah pawh mi 10 aia tlem lo thawktu chhawrte tan in-register tur a nih thu sawiin, hnathawk tura an chhawr thla khata Rs. 21000 aia tamlo hlawhte chuan ESI hnuaiah hamthatna hrang hrang an dawng thei tih an sawi.
Hei bakah hian MR, casual employee leh private hnuaia thawkte chanvo humhim a nih theihna’n kum 10 hmalam atanga an lo nawr tawh, Labour Court din pawh an ngen nawn leh tih NTUM hruaitute hian an sawi bawk.