Nuamsam lo chungin Djokovic a chak

Thawhleh zan khan Wimbledon 2025 khelh chhunzawm a ni a, player ngaihven hlawh Novak Djokovic chuan nuamsam lo tak chungin hnehna a chang. Djokovic rual hian World No. 1 Jannik Sinner pawhin hnehna a chang. Djokovic leh Sinner ten hnehna an chan lai hian champion tura rinkai zinga mi Alexander Zverev chu second round lut zo lovin a tla nghal thung.
Grand Slam-ah vawi 24 champion tawh a, Wimbledon (Championship) ah vawi sarih ngawt champion tawh Novak Djokovic hian Centre Court-ah Alexandre Muller a hmachhawn. Muller lakah bul tan tha viau mah se khawlum lutuk leh a taksa nuamsam lo vangin Serb hian ngai a awh lo viau a, set a hloh phah hial bawk. Set khat hloh bawk mah se harsa tak chungin a chak a, second round a lut ta tho thung.
Grand Slam-ah vawi 25 champion hmasa ber nih tum Djokovic hian Muller lakah bul a tan tha viau a, set khatnaah break a nei zawn nghal a, game khat chauh hloh chungin set a la. Set hnihna tir lamah pawh a khel tha chho viau a, break theihna hun remchang a nei fo. A khingpui break theihna hun remchang vawi 11 zet nei mah se a chhawr tangkai zo lo vek a, tie-break-ah 5-2 ngawta hma a hruaina humhim zo lovin, set a hloh zui ta hial bawk.
Set a hloh hnuin Nole hian medical time-out a la a, minute 10 chhung zet enkawl  a ni. Enkawlna a dawn hnuin ngai a awh chho leh ta a, a khel tha zui ta viau. Set thumna leh set linaah game hnih ve ve chauh hloh chugin set a la zui leh ta mai a. Muller lakah hian  6-1 6-7 (7-9) 6-2 6-2 a hehnehna chagin second round a inhlangkai ta a ni. Wimbledon final-ah vawi hnih tlawm zawn tawh Djokovic hian Dan Evans a hmachhawn zui leh ang. Djokovic hian Wimbledon hi Grand Slam a lak belh theihna hun remchang ber nia a ngaih thu a sawi a. Wimbledon-a champion ngun ber Roger Federer champion zat tluk turin champion a tum hle ngei ang.
Thawhleh zana inkhel dangah World No. 1 Jannik Sinner chuan an hnampui Luca Nardi hmachhawnin bul a tan. French Open final-ah Carlos Alcaraz laka tlawm Sinners hian Nardi lakah 6-4 6-3 6-0 in hnehna a chang a, awlsam takin second round a lut.  Sinner hian second round ah Aleksandar Vukic a hmachhawn zui leh ang.
Djokovic leh Sinner ten hnehna an chan lai hian seed no 3 Alexander Zverev chuan first round a paltlang zo ve lo thung. 
Player tha tak ni chung si a Grand Slam-a la champion lo Zverev hian Anthur Rinderknech a hmachhawn a, inkhel hmuhnawm takah vanduai zawk a ni a, a tla nghal. Rinderknech hian Zverev lakah hian 7-6 (7-3), 6-7 (8-10), 6-3, 7-6 (5-7) leh 6-4 in hnehna hlu tak a chang.