Thawhleh zing khan NBA Conference play-off semi-final khelh chhunzawm a ni a. Game khatnaah chak tawh Denver Nuggets chuan Phoenix Suns an hneh nawn leh a, final an hnaih deuh deuh zel. Thawhleh zinga inkhel dangah Philadelphia 76ers chuan Boston Celtics chu semi-final game khatnaah an hneh ve bawk.
Semi-final game hnihnaah Denver Nuggets in Suns lakah bul an tan tha lova, quarter hmasa berah hnufual zawkah an tang a, quarter hnihnaah point khatin chungnung bawk mah se, point hniha hnufual zawk chungin chawl-hlawk an hmang.
Chawlhlawk hnu lamah Suns an khel tha chhun-zawm a, quarter thumnaah point khatin an chungnung zui leh a, series ah 1-1 ni turin chak theih beiseina sang tak an nei hman. Hnufual zawkah tang chungin Nuggets hi quarter hnuhnung berah an khel tha ta viau thung a. Point 13 zeta chungnung zawkah tangin, point 10 in hnehna an chang a. Series ah 2-0 in hma an hruai ta chiah a ni.
Point 97-87-a Phoenix Suns an hneh tum hian Nuggets player pawimawh Nikola Jokic chuan point 39 a thawk chhuak a, a che tha leh pek hle. Suns tan hian Devin Booker chuan point 35 a thawkchhuak a. Kevin Durant pawhin point 24 thawkchhuak bawk mah se an team an chakpui zo chuang lo.
Denver Nuggets leh Phoenix Suns tan semi-final game hnihna an khelh laiin Philadelphia 76ers leh Boston Celtics te chuan semi-final game khatna an khel ve thung a. 76ers chuan point 119-115 in hnehna an chang.
Celtics hian 76ers lakah tha takin bul an tan a, quarter hmasa berah point 7 zetin chungnung zawkah an tang nghal. Celtics lakah bul tan tha lo mah se 76ers an insiamtha thuai a, quarter pathumah chungnung zawkah an tang ta vek a, point 5 in hnehna an chang zui ta a ni.
Semi-final thawhkhatnaah hian 76ers tan James Harden a khel tha viau a, point 35 zet a thawkchhuak.
Nuggets an chak nawn leh
Get real time updates directly on you device, subscribe now.
Prev Post
Next Post