Him tuma tan khawh Everton

Thawhtan zan khan English Premier League (EPL) ah inkhel pakhat a awm a. Tlakhniam pumpelh tuma tan khawh pahnih Leicester City leh Everton te inkhelah chak zawk an awm thei lova, 2-2 in an inhnehtawk. EPL-ah hian champions league khelh phak tuma inelna boruak a ngaihnawm ang bawkin him tuma tan khawhte inel boruak a ngaihnawm viau bawk.
Tlahniam thei dinhmunah ding a, 19-naa awm mek Everton chu 16-naa awm mek Leicester City hmachhawn turin King Power Stadium-ah an leng lut a. Mimualah goal thun hmasa in, bul tan tha zawkah tang bawk mah se Toffees hian an mamawh point thum an hlawhchhuak zo lo. Foxes pawhin him tura hma lam pan an tumna an tihlawhtling zo bik lova, him tumin thapui an thawh zui viau a ngaih ve dawn bawk.
King Power Stadium a lenglut Everton hian bul an tan tha a, inkhel tan atanga minute 15-na lekah penalty an hlawhchhuak a. He penaltu hi Dominic Calvert-Lewin chuan chiang taka pet goal in hmahruaina goal a thun. Hma takah goal an thun vangin phur takin an inlan zui a, Foxes lakah point thum hmuh tum viau mah se an goal an venghim rei thei bik lo thung. Minute 22-naah Caglar Soyuncu chuan Wout Faes siam tha tak chu muangchai raihm, chiai hauh lovin a pet goal a, an si phurh a sut.
Goal khat ve ve an thun hnuin inkhel a hmuhnawm zui viau a, mualneitu Leicester chu goal thun hmasa zawkah an tang ta nge nge. Minute 33-naah James Maddison siamsak chu veteran sriker Jammie Vardy chuan fuh zetin a khalh tlang a. Everton si nghak Jordon Pickford a bum leh zet hnuin goal ruakah awlsam takin a pet goal a, hma an hruai letna goal a thun. Vardy goal thun hmang hian 2-1 hmahruai chungin Leicester City in chawlhlawk an hmang.
Chawlhlawk hnu lamah him beisei zui thei tura point mamawh Everton in bul an tan tha nawn leh a, goal an thun leh thuai. Foxes defender ten ball an clear theih loh vangin Toffees hian goal thun theihna hun remchang an hmu a. Alex Iwobi chuan minute 54-naah lei hrulah pet goal in, an si phurh a sut.
Goal hnih ve ve an thun hnuin team hnihte an innawr tawn viau a, goal thun tumin tan an khawh nasa dun hle. Chak theihna hun nei tha zawk chu Mualneitu Leicester City an ni a, penalty an hmu. Penalty an hmuh hi James Maddison-a’n a pet a, pet chhe lem lo mah se Everton si nghak Jordan Pickford chuan tha zetin a dang a, an team a chhan him. Leicester in an hun tha an hlah hnuin goal dang a luh belh tawh lova, 2-2 in an inthathen zui ta a ni.
An mualah an chak zawh loh vangin Leicester in an chung chiaha awm West Ham hnaih an tumna an puitlin zo lova, dinhmun derthawngah an ding chhunzawm zel. Foxes hian vawi 34 khelin point 30 an hmu mek a, tlahniam thei dinhmuna ding mek Nottingham Forrest nen an point hmuh a inzat. An muala an inhnehtawkpui Everton nen an inkarah point khat chauh a tla zep mek bawk a. Khelh li khelh hmabak an la neihah him turin chak an mamawh zui viau ang.
EPL team vangtlang tak ni thin Everton dinhmun a chhe tulh tulh a, table hnuai ber dawtttu an luah chhunzawm zel. EPL-ah hian 15 na chin hnuai lam pang zawng chu tlahniam thut thei dinhmunah an la ding vek hlawm a. 15-naa awm mek West Ham United leh 19-naa awm mek Everton te inthlauhna hi point 5 chiah a ni. Champions league khelh phak tuma Newcastle United, Manchester United, Liverpool leh Tottenham te an inel boruak a nung thar viau a. EPL khelh chhunzawm tuma West Ham, Leicester City, Leeds United, Nottingham Forrest leh Everton te inel boruak a ngaihnawm ta viau bawk. Table mawngphah a awm mek Southampton erawh chu khelh 34 atanga point 24 chiah an la hmuh vangin tlahniam chiang tlukna ngaih theih an ni tawh thung.