Nuggets tan Jokic a vul

Thawhtan zinga NBA regular season khelhah champion lai Dever Nuggets chuan Golden State Warriors an hneh. Nuggets tan Nikola Jokic a vul hle a, season kal meka a 18 nan triple-double a puitlin. Thawhtan zinga inkhel dangah Milwaukee Bucks in hnehna an chang ve bawk.
Champion lai Denver Nuggets hi Chase Center, California-a an mikhual Golden State Warriors lakah an khel tha viau a, quarter khatnaah an hnufual zeuh tih loh chu quarter thum dangah chungnung zawkah an tang vek. Quarter hmasa berah hnufual bawk mah se Golden State Warriors hi point 119-103 in an hneh.
Warriors an hneh tum hian Denver Nuggets player pawimawh Nikola Jokic chuan point 32 a thawkchhuak a, ball sawhlet vawi 16 a dawn bakah assist vawi 16 zet a nei tling bawk a, triple-double a puitlin. Jokic hian season kal mekah vawi 18 ngawt triple-double a puitlin tawh a. Season kal mekah amah aia triple-double puitlin tam awmchhun chu Sacramento Kings player pawimawh Domantas Sabonis a ni a. Ani hian NBA regular season kal mekah triple-double vawi 20 a puitlin der tawh.
Thawhtan zinga inkhel dangah Milwaukee Bucks chuan point 119-98 in an khingpui Philadelphia 76ers an hneh. Bucks hian Eastern Conference-ah pathumna an luah chhunzawm a. An khelh hnuhnung vawi li a vawi thum tlawm tawh 76ers hian Eastern Conference-ah pangana an luah ve mek thung.