Nungcha humhalhna lama dan leh hrai hriat tur inhrilh

Mizoram Environment Forest & Climate Change Department, sawrkar laipuia Wildlife Crime Control Bureau (WCCB) leh Wildlife Trust of India New Delhi tangho chuan Thawhlehni khan Champhaiah ‘Workshop on Identification of Wildlife Articles’ an nei.
Workshop-ah hian India rama nungcha humhalhna dan pawimawh ber – Wildlife Protection Act 1972 atana sawrkar laipuiin amendment a siamthara hriat tur, wildlife chi hrang hrang, exotic leh native species hmanga dan kalha sumdawnna lama hriat tur zir ho a ni. Mizorama Indo- Myanmar international border, a bikin Champhai leh Zokhawthar kaltlanga dan kalha ramsa leh nungcha hmanga sumdawnna chungchanga dan hmanga rang taka hmalak dan inzirtir a ni bawk.
Champhai district-a enforcement official hrang hrang – EF&CC, Police, Excise & Narcoticst, Customs leh Assam Rifles bakah Champhai MJA atangin an tel a ni.
DFO Champhai Lalbiakchama Chawngthu chuan Mizoram chu Indo- Burman international biodiversity hotspot huamchhunga awm a nih angin, thing leh mau, ramhmul chi hrang hrang leh nungcha leh sava lam chi ah kan hausa tih a sawi a. Kan biodiversity hlutna hria a, nasa zawka a humhalh kawnga sawrkar department hrang hrang bakah mipuiin mawh kan phur tih a sawi a ni.
Workshop-ah hian Wildlife Trust of India New Delhi-a Wildlife Crime Control Division senior field officer Monesh Singh Tomar leh WCCB wildlife inspector Dr Pragatheesh ten an zirtir a ni.