State bulhnaia ruihhlo kalkawng zirbing turin Study Team din rel

State Level Ruihhlo Do Working Committee chuan Mizoram chhehvela ruihhlo tawlhrukna kalkawng zirbing turin Study team din a rawt.
Working Committee hi an chairman, Excise & Narcotics minister Lalnghinglova Hmar hoin Thawhlehni khan an thukhawm a. Chairman chuan nakum lama a result teh theih turin kumin sawrkar kum chhung hian ruihhlo do dan tur ‘focus’ bik nei turin a sawm.
Thutkhawmah hian ruihhlo dotu pawl hrang hranga fund sem sawm dan tur thlirho niin, Excise & Narcotics, Police, Food & Drugs Administration, CYMA, MTP, YLA, SWD, MSACS, Mizoram district 11-a sem chhuah bakah training, workshop, meeting leh mass media campaign nan sawrkar atangin cheng nuai 200 phalsak an ni report a ni. Sum sem chhuah hnuah tangkai taka hman a nih theih nan uluk taka a hman dan tur leh a hman hun tur inkaihruaina fel tak duan nise, an ti.
Working Committee hian Mizoram Social Defence & Rehabilitation Board Social Welfare department buatsaih ‘Handbook on Ruihhlo do’ tih chu pawm tlangin, a copy siam belh nise an ti a. Mizoram chhehvela ruihhlo kalkawng zirbing turin Study Team din nise, District Level Committee on Ruihhlo do-ah Sub Hqrs YMA, MTP leh YLA OB atangin vice chairman ruat nise tih a ni bawk.
Thutkhawmah hian CYMA, MJA, MZP, Local Council Association, Mizoram Kohhran Hruaitu Committee aiawh bakah Excise & Narcotics, SWTA & WCD, Higher & Technical, LESDE, Food & Drugs Administration, Mizoram Social Defence & Rehabilitation Board, Education leh Police atangin official-te an tel a ni.