Nunna hi…

September ni 20 Pathiannia Zakaria Lalhriattluanga tualthih chungchangah, September ni 22, Thawhlehni khan New Builum khaw mipui chu, tualthihna thlentirtute an tantirna Kolasib District Jail kawtah an pungkhawm a, an khaw mi thihnaah Justice an zawng nghal a. He thil thlenga tualthattua puhte chenna khua Kawnpui Hmar Veng YMA leh VC te chuan thuchhuah siamin ngaihdam an dil tawh bawk a. Hetih lai hian, he chanchin buatsaih lai thleng hi chuan, Mizorama Kohhran hrang hrang leh Central YMA lam chuan he thil thleng demna leh duhlohna thu an la auchhuahpui lo niin a lang a. Thla hnih kalta maia din thar, Mizoram State Human Rights Commission pawhin thawm an la nei lo nia hriat a ni a. MHIP, MUP leh MZP lam pawhin aw an chhuah rih lo nia hriat a ni bawk.
Hetiang thil rapthlak tak hi state danga thleng ni ta se, tuna kan sawi pawl hrang hrangte khi, thuchhuah siamin an au chhuak sup sup tawh mai lo’ng maw tih ngaihdan a siam theih awm e; ngaihdan mai phei zawng a ni a.
Hetianga kut inthlakrawn avanga tualthihna ang hi Mizoramah hian a lo thleng fo tawh a. VDP ten an dawpna lama kut an thlak nat avanga thi ta mai te pawh sawi tur a awm zauh zauh bawk. Chip chiar taka report tarlanna hmun a nih loh avangin heti hian duhtawk rih ila. Public domain lama Police crime report kan hmuh theihah chuan, kum 2022-2025 chhung khan murder case 112 a awm a, chung zinga group assault avanga thihna thleng chu case 6 a awm bawk. Han en chiang ila, kum li chhungin tualthahna 112 a thleng a nih chuan, chawhrualin kum tin 28, thla tin 2.3; chumi awmzia chu kar hnih danah tualthahna a thleng ziah ang a nih chu. Hei hi a veiawm takzet a ni!
Tuna kan thupui ber chu, Nunna hi… khawvela thil hlu ber a ni, tih hi a ni. Nunna petu chu Pathian a ni a, nunna titawp theitu pawh Pathian bawk a ni. Nunna chungah hian mihring hian eng thuneihna mah hi kan nei lo reng reng a, chuti chung chuan heti hian nunna kan inlaksak leh mai thin si a. Hetiang thil rapthlak tak a thleng chung pawh hian, chatuana nunna neih theihna tura buaipuitu ber kohhran lam lahin ‘pep e, pup e’ an ti mang bawk si lova, engemawti zawng tak chuan, nunna hi kan va ngai thupui awm lo ve maw le, han tih mai te pawh a awl awm e.
Eng pawh ni se, heng zawng zawng khaikhawmtu chu chhungkua bawk hi niin a lang. Chhungkua hi mihring sikul hmasa ber a ni a, tuna heng thil duhawm lo tak tak thlen thin chhan pawh hi chhungkaw sikul result a that loh vang a nih a rinawm ber. Chuta mawhphurhna sang tak nei chu kohhran hi a nih a rinawm. Mahni chhungkaw administration chingfel hman lek lo hian kohhran programme behchhana vah chhuahna tur hi kan lo siam tam lutuk te hi a ni thei mai ang em? Social evil te pawh hi, pawn lama intan ni lovin, chhungkaw administration thlahthlam atanga bul intan a nih a rinawm.