Nupa kara sawi tam loh chi

Nupa kara sawi tam loh chi
Nupa hlim leh inkawp nghet tak ni thei tur chuan thil then khat sawi fo loh atan tha zawk a awm a, chutih laiin thenkhat chu sawi deuh a fo ngai thung.
Nupa hlim ni tur chuan inpawh tawn a ngai a, mahse, inpawh leh lutukna lamah thil a kal sual ve leh tho. Marriage counsellor Thea Tembhekar leh Kersi Chavda, Bombay Psychiatric Society-a president lo ni ve ve tawh te chuan nupa tana hriat tur pawimawh ti hian an sawi:
1. Kawppui te hnena ngaihzawng hlui te chungchang sawi zauh te chu a pawi lem lo thei. Mahse, a chip chiar lutuka sawi erawh a tihchi loh khawp ang. In awm dun hmasak dan te phei chu a zawt che a nih pawhin a sawia sawi hauh loh tur a ni.
2. Kawppui te chhungte hi kan ngaina ve vek kher lo. Mahse, chu chu sawichhuah kher a tul lo. An khawsak danah emaw, ei leh in siam danah emaw, inchei danah emaw, kawppui te bula an chhungte sawisel fo hi chin loh tawp tur a ni.
3. I kawppui chu a thau emaw, a chal a kawlh emaw pawh ni se, nupa inhauh leh inhnial nikhuaah sawichhuah loh a fuh ber. Chu chuan a rilru a hliam thei a, a rilruah ser a siam thei a ni. Ser a awm tawh chuan tih reh leh chu har tawh tak a ni.
4. I kawppui ni lo midang hmeltha i tih thu sawi kha a pawina em em a awm lo thei- hmeltha i ti satliah mai a nih chhung chuan. Mahse, tha i tih thu te phur taka i sawi fo chuan harsatna a thleng thei a, thikthu a chawk tho thuai ang a, “|ha i tih te chuan nei mai ta che,” intih hun a thleng mai ang.
5. Inthen i duh tak tak a nih loh chuan he tawngkam hi a sawi pawh sawi suh. Inhauh leh inhnial deuh apianga sawi chhuah fo hi chin loh tawp tur a ni. Vawikhat i sawi tawh chuan i kawppui rilruah a riak reng tawh dawn a, a bulah i hlim tak tak loa ngaiin a la chhuahsan zawk hlauh thei che a nia.
6. Sum leh pai chungchanga inhnialna awm thei chu tlansan hram hram tum tur a ni. Pawisa chu ta bik awm lovin ‘kan ta’ tihah chian tur. Nupaa hlawh nei nih loh pawhin a hlawh chhuaktu zawkin sum hman dan tur chungchang reltu nih tum kher loh tur.
7. Duh zawng leh duh loh zawng te inhriat tawn sak tum tur a ni. Kan duhzawng te kan kawppui te bulah sawi hreh loh tur a ni. Kawppui te duh zawng leh duhdan te sawisel sak chin loh tur a ni.
8. Nupa nun hmanna kawngah duh zawng leh duh dan kan neih te kawppui te bulah sawi hreh loh tur a ni a, kawppui te duh zawng hriatthiam tum bawk tur a ni. Hetiang chungchang sawi hi zahthlaka ngaih tur a ni lova, in zawh tawn pawh zahthlaka ngaih tur a ni lo. Chu chuan nupa hlimna a thlen zawk dawn a ni.