Officer zingah mahni ram hrechiang lo an awm thin – TBC Lalvenchhunga

Officer zingah mahni ram
hrechiang lo an awm thin
– TBC Lalvenchhunga
Sawrkar officer zingah mahni ram chin hrechiang lo an awm thin a, mahni thawhna ram hrechiang lo officer nih chu thil zahthlak a ni tih adviser to chief minister TBC Lalvenchhunga, MLA chuan a sawi.
Administrative Training Institute-in combined civil service officer thar 34 tana Basic Foundation Training Course a buatsaih tur chu Thawhlehni khan hawn a ni a. Hmanpuitu adviser to CM (Finance & Planning) hian, induhsakna (favouritism) vanga tling ni lo, an phu vanga tling an ni a, an chhuanawm hle rualin, officer-a tlin chu a tawpna ni loin, a bul tanna zawk a ni a. An thutna tur office pawh anmahni ta ni loin mipui ta a ni zawk a. A lalna lai nuam ti a, mawhphurhna hlamchhiah si an nih chuan officer hlawhchham an ni dawn tih a sawi.
“Sawrkar hnathawkte hi sawrkar khawl nghet in ni a, democracy-ah in pawimawh em em a, danglamna thlentu tur in ni. File in khawih pawhin ‘file phena mihring (nunna) awm’ kha ngaihtuah thleng phak rawh u. Thlemna hrang hrang in la tawk dawn a, chutiang hunah chuan, ‘Dan chhungah a awm em’ tiin inzawt thin ula, dik ngam ang che u,” a ti.
Officer zingah mahni ram hrechiang lo an awm thin tih sawiin, ram chhunga zin chhuak tam tur leh kan lui, kan ram awm dan, hnam hrang hrang cheng leh an eizawnna chena hrechiang turin TBC Lalenchhunga hian a chah a. Mahni thawhna ram hre chiang lo officer nih chu a zahthlak tih a sawi.
Department- centric official, service- centric official-te avangin sawrkarin harsatna a tawk thin a, mipui dah pawimawh ber (citizen- centric) ula. In career hi chu in thiltih, in result leh in thawhchhuah (delivery) atanga teh ni zawk rawh se, chu chu in hnuhma tur a ni,” a ti a. Basic Foundation Training pawh hi service hrang hrangte inkara inpawhna leh thawhhona tha thlentu ni se a duh tih a sawi bawk.
Digital lama hmasawnnain awlsamna tam tak min pek rualin, artificial intelligence rin leh lutuk a him lo tih sawiin, AI-in a thlak (replace) theih tura awm lo turin a chah.
ATI director Rita Lalnunmawii Pachuau pawhin, training kalpui dan tur chu tawnhriat behchhana buatsaih a ni tih a sawi a. Dan (rules) ringawt zir loa, hnathawhna hmuna hman tangkai tur ‘soft skills’ ngaihpawimawh a ni dawn tih sawiin, service hrang hrang riakluta an training chuan inpawhna tha zawk a hring chhuak dawn tih a sawi a ni.
Combined civil service officer training hi September 8 atanga October 30 thleng neih tur a ni a, an riaklut a ni.