‘Save Chanmari’ kalpui tan dawn

Aizawl Chanmari Veng chuan an huamchhungah zan lamah thil thleng duh awm lo, nunna hial channa a awm tak avangin zan duty an indah dawn a. ‘Save Chanmari’ an kalpui dawn tih an sawi.
Chanmari Local Council leh YMA Chanmari Branch thuchhuak chuan, tunhnaia Chanmari Veng chhunga lirthei khalh fimkhur loh avanga chetsualna leh thihna hial a thlen bakah insual buaina thleng thin chu pawi an ti hle a. Hemi chungchang an ngaihtuah hnu ah hma lak dan tur duan a ni tih a sawi.
Chanmari Veng mipui leh an vengchhunga lawilutte him zawkna atan Chanmari mipui leh private security an duty tawh dawn a. May 29 (Zirtawpni) zan dar 9.30 ah Chanmari kawnah duty neih tan tum hi hawn a ni dawn.
He hmalakna hi a hmingah ‘Save Chanmari’ an vuah a. Chanmari Veng mipui, veng himna atana thahnemngaite pen chhuak turin an inngen tih sawiin, ‘Chanmari vengchhungah lirthei chak taka tlan thin leh buaina siam chingte fimkhur hle tura hriattir an ni a. Dan bawhchhetute chu an phu tawk hremna an hmuh ngei theihnan hma lak a ni ang,’ a ti.