Oil dahkhawlna siam dan rel

Rel hmangin emaw lirthei (tanker) hmangin emawa Mizorama oil dahkhawlna (oil depot) siam dan tur ngaihtuahin Thawhtanni khan Food Civil Supply & Consumer Affairs minister B Lalchhanzova hoa thutkhawm a ni.
Mizorama petroleum products-a harsatna a awm loh nan leh a tam thei ang ber stock neih theih nan Indian Oil Corporation (IOC) Ltd. remchan dan zawnga oil depot siam dan tur sawi a ni a. IOC aiawhte chuan Mizoram chu tlangram a nih avangin railfed oil depot siam chu harsatna hrang hrang avangin a theih loh hmel tih an sawi rualin, roadfed oil depot chu ram acre 15-20 a zau a awm theih chuan siam ngei an duh tih an sawi a ni.
Roadfed oil depot hi hun lokal zelah remchang zawngin railfed oil depot-a siam leh tura hma lak a nih theih nan hmun zawn a tha tih sawi a ni a. Mizoram tana storage oil depot siam tum hi ni 30 vel daih tura ruahman tum a ni.
Thutkhawmah hian FCS&CA hotute, Land Revenue hotute bakah IOC Ltd hotute an tel a ni.