Oil siakchhuak tihtlem hlauhawm zawk

Oil leh gas siakchhuah tihtlem chu ‘hlauhwm leh dawn tawi’ a ni ang tiin energy giant Shell boss chuan a sawi.
Wael Sawan chuan khawvel chuan ‘oil leh gas a mamawh ngawih ngawih’ tia sawiin renewable energy lama insawn tuma hmalakna chu a kal chak tawk thei lo tiin a sawi bawk a.
China atanga energy demand sang leh Europe a thlasika energy demand sang chuan energy price leh bill te a tisang lo thei dawn lo tiin a sawi bawk a.
Sawan chuan tuna Shell tena oil production kum 2030 thlenga kalpui zui zel an tum thu an sawi chuan climate scientists te a tithinur hle thung a.
Professor Emily Shuckburgh, University of Cambridge a climate scientist chuan Shell te ang firm chuan ‘society-a chan chau ber ber te chu oil leh gas hman rei mamawhna chhan’ tia sawi lova green transition lama nasa zawka hma an lak a ngai tiin a sawi a.
Sawan thung chuan, “Zah tak chungin ka hnial a ni,” tia sawiin, “Hlauhawm leh dawn tawina dik tak zawk chu oil leh gas production tih tlem a ni. A chhan chu cost of living a tisang dawn a, nikuma kan hmuh ang bawk khan tih tlem a nih chuan cost of living a sang leh chak dawn a ni,” tiin a sawi.
Khawvel chuan green alternatives te thlangin fossil fuel hnuchhawn a nih theih nan intlansiakna a kalpui mek a, global leader te chuan kan chenna khawvel lum san belhna chu tun century-ah 1.50C pel lo tura siam an tum a ni.
Nikum khan European Commission chuan EU chuan green energy lama insawnin Russian oil leh gas a innghahna a neih loh nana ruahmanna an tlangzarh tawh a.
Chutih laiin ram tam tak te chuan sustainable energy a inleh a nih theih nan infrastructure tul leh mamawh ang an nei tawk lo thung.
Sawan chuan nikum khan indona kaihhnawih avangin ram rethei zawk Pakistan leh Bangladesh te chuan an mamawh Liquid Natural Gas (LNG) an duhtawk an hmu thei lova a chhan ber pawh a tam ber te chu Northern Europe lama pawhpen a nih vang a ni, a ti a.
“Heng ramte LNG tur hi laksakin hei vang hian ram rethei zawka naupang te chuan mombati hnuaiah lehkha an zir a ngaih phah,” tiin Sawan chuan a sawi a. “Kan inthlak danglam dawn a nih chuan kan zavai a huap a ngai a, khawvel hmun khat chauh huam a ni thei lo,” tiin a sawi bawk.
Committee of CLimate Change te chuan household gas appliances te chu respiratory problems leh cardiovascular disease thlentu tiin an sawi a.
Claire Fyson, co-head of climate policy at Climate Analytics, global science and policy institute chuan, “Fossile fuel atchilhna emaw mobati hnuaia hnathawh duhthlan tur tia ngaihdan awm hi a dik lo, renewable energy te chu a thianghlim a, a man a tlawm a, public health tan a tha zawk tih kan hrechiang a ni,” tiin a sawi ve thung.
UK pawhin international climate finance atan 11.6 billion pound thehchhuah a remti a, mahse, Covid pandemic khan economic lama harsatna nasamen lo a siam avangin a tibahlah zawk a ni.
Hetih lai hian International Energy Agency hotu lu Fatih Birol chuan, “Sorkarte hian climate crisis an ngaihtuah takzet a nih chuan oil, gas leh coal lamah investment thar tih a rem tawh lo,” tiin a sawi a.
UN hotu lu ber Antonio Guterres pawhin oil leh gas production lama hmathar lak chu ‘economic leh moral lama mawlna’ tiin a sawi bawk.
Shell company-te hian history thui tak neiin UK a inbun an ni bawk a. Mahse, Sawan chuan energy policy lehtaxation laka UM policy chiang lo lutuk chu investment tih nan a duhawmlo a ti a. Chutih laiin UK chuan a mamawh oil leh gas zahve lawih chu ram dang atanga a chawk luh a ni thung a ni.
Sawan chuan Shell-in an headquarter leh stock market chu US-ah pawh an sawn mai theih thu a sawi a. American oil company te chuan an share an pe sang zawk a. Entirnan Exxon Mobil te chuan Shell te aiin dollar khat zela profit an neih pawh 30% in a tam zawk a ni.
Sawan chuan UK aiin US official te chuan oil leh gas company te an thlawpna a tha zawka a hriat thu a sawi a. “Keini chuan company mipui nawlpui mamawh em em energy pechhuaktu angah kan inngai a. Lebanon chhuak ka nia energy mamawh san em emna ram niin hei vang hian ka chiang zual a ni,” tiin a sawi bawk.
Shell hian company hlu tak niin an headquarter London atangin US ah an sawn a nih chuan London stock exchange hlutna chu a tlahniam duai dawn thung. UK financial prestige khawihin financial service lamah hna chan tur tam tak a thlen lo thei dawn lo bawk.