Ukrainian President Volodymyr Zelensky chuan Paris khawpuia 2024 Olympics-ah an ram run mektu Russia infiammite tel ve phalsak ni lo se a duh thu auchhuahpui chungin an tel ngat a nih chuan mi rikrapna leh pawisawilote chunga tharum thawhna hi khawvelin a pawm tihna a ni ang ti hialin a auchhuak.
-- Advertisement --
Zelensky hian hemi chungchang hi French President Emmanuel Macron pawh a sawipui tawh tih sawiin, Moscow-in an propaganda thehdarhna hmanrua atana Olympic an hman hi engti kawng maha phalsak chi a nih loh thu a tarlang tel.
Tunhnaiah International Olympic Committee (IOC) chuan Olympic-a Russian leh an sangawizawnpui Belarusian in-fiammite chu an ram behchhan lo neutral athlete anga Olympic-a tel an phalsak mai theih thu an puang a, hei hi Ukraine chuan an duh lo takzet a, Russian leh Belarusian infiammite teltir an nih vaih chuan Paris 2024 hi boycott-ah an vau hial a ni.
IOC hawiher hriat tur a awm hnu lawk hian a tih thin dan pangngaia video kaltlanga zan lam thuchah a sawiah Zelensky a sa phat a, “Olympic Games-a Russian athlete-te teltir tumna chu midangte pawngnekna leh pawisawi lo laka firfiaka chetna khawvel hriata kan pawmzia lantirna chi khat a ni ang,” a ti hmiah!
Ukraine president chuan Games leh infiamna hunpui dangte chu Russia-in mi ram chhuha ram an zauh dan sawipialna leh hmaiphihna hmanrua (propaganda) atan engti kawng maha hmantir a remchan loh thu a sawilang tel bawk.
IOC chuan tunkar tir lam khan neutral athlete nihna nena Russian leh Belarusian infiammite Olympic-a tel phalsak chungchang hi sawichhuakin, an passport avanga infiammite danbeh ngawt a rem loh thu chu an tanfung a ni.
Juda thisena piang Zelensky ngaihdan a ni awzawng lo a, an ram infiammite indona muala an thih zawih zawih laiin infiamna huangah zawm nei lo ram (neutrality) a awm thei lo tawp tih a sawi a, Nazi hoin ro an rel lai Berlin khawpuia 1936 Olympic Games nen a khaikhin nghal.
“Olympic chungchangah hian tihsual lianpui a awm. Olympic movement leh terrorist state-te hian kawng hran ve ve zawh rawh se,” tih chu a thu rolum a ni.
UK sawrkar pawhin ram pahnih infiammite neutral athlete anga teltir tumna a dem thu tarchhuak ve tawhin, khawvel chu indona tak tak atanga bihruk tumah a puh nghal.