Olympic champion a\angin world champion
Olympic champion atangin world champion
World Athletics Championships 2023 kal mekah India feikhawhtu ropui Neeraj Chopra chuan Pathianni khan history thar siam lehin men’s javelin throw-ah gold medal a awrh a, Olympic champion hi Indian zinga javelin world title hawn thei hmasaber a ni.
Budapest khaw feikhawhah kum 25 mi Chopra hian a vawihnihnaah metre 88.17-a thui khawhin, silver awrhtu Pakistan mi Arshad Nadeem chuan season kal laia a khawh thui ber tawngbuain metre 87.82 a puitlin ve bawk.
Jakub Vadlejch of Czech Republic kutah bronze medal a lut ve thung.
Nikum World Athletics Championship-ah Chopra hian gold hlawhchhuak zo loin silver medal a lungawipui mai a ngai a, kuminah erawh a duhthusam tipuitlingin world title a sualchhuak a, nakum Paris Olympic-ah pawh a title kawl lai humhim tura rinkai a ni zual sauh.
World Athletics Championship bikah India hian record a nei ropui lo a, Neeraj Chopra tih loha he inenla liana Indian medal winner awmchhun chu kum 2003 Paris women’s long jump-a bronze medal awrhtu Anju Bobby George chiah kha a la ni!
Legendary shooter Abhinav Bindra pawh khan Olympics leh World Cham-pionships title a lo kawl ve ve tawh a, Chopra hi Bindra tih loha he title hlu bik pahnih la leh thei Indian awmchhun a ni. Kum 23 mi lek a nih laiin Bindra khan World Cham-pionships title a sualchhuak a, kum 25-ah Olympics gold a awrh zui leh.
Indian superstar Chopra hi 2021 Tokyo Games-ah khan Indian Olympic track and field gold medallist hmasaber a lo ni tawh a; javelin throw history-ah Olympics leh World Championships title la ve ve thei pathumna niin, feikhawhtu ropui kal hmasa pahnih Jan Zelezny of Czech Republic leh Andreas Thorkildsen of Norway-te hnung a zui ve ta a ni.
Zelezny khan kum 1992, 1996 leh 2000-ah Olympics gold awrhin, kum 1993, 1995 and 2001 khan World Championships title a hlawhchhuak a; Thorkildsen ve thung hian 2008 Olympics-ah gold awrhin, 2009 World Championships title a la bawk.
Instagram lama follower maktaduai 6.3 neitu Chopra hian tun season-a a khawh thui ber (88.77m) hmangin final a lut a, Pathianni final-ah round hmasa lama a khawh thui zawng pha lo chungin gold a awrh zui ta tho a ni.
Kawng tinrenga inel leh inhal India leh Pakistan chuan Budapest mipa feikhawhah chungnung zawk nih an han inchuh kha a ni a, a ropui dangdai ve hrim hrim!
Tun kha 2022 Commonwealth Games gold medalist Nadeem tan kiu leh khup hliam zai a tawh hnua season kal laia intihsiak a hmachhawn vawikhatna niin, insawiselna nei lo Chopra laka hnehna a chang zo ta lo kha thilmak niin a lang hran lo ang!
Men’s javelin-ah hian Indian dang pahnih Kishore Jena (84.77m) leh DP Manu (84.14m)-te chuan top eight luah pha ve bawkin, 12-man final-ah Kishore hi pangana a ni a, paruknaah Manu tawpin, tun hi World Championship-a Indian pathum top eight-a an lan vawikhatna a ni.
Pathiannia a hlawhtlinna chan leh nen Chopra hian he infiamnaa title awm thei zawng zawng a hui kim ta a; a hlawhtlin tawhnate chu Asian Games (2018) and Commonwealth Games (2018) title bakah Diamond League Meeting title pali (kum 2022 leh 2023-ah pahnih ve ve) leh nikum Diamond League champion’s trophy-te kha a ni.
Kum 2006 khan junior world champion lo ni tawhin, a kumleh 2017-ah Asian Championships title a khawhchhuak bawk.