Online-a ILP dil theihna tur hawng Nikumah ILP atangin nuai 616 hmu

Online hmanga ILP dil theihna – Revised Online Inner Line Permit (ILP) Portal Phase-I chu Thawhlehni khan Home minister Lalchamliana’n a hawng.

Minister chuan ILP kenkawh kawngah rahbi thar kan chuangkai a ni, tiin, ILP chu hnam changkang leh tam zawk ten min chimralna tur kawnga kan inhumhimna pawimawh tak a ni tih a sawi. Mizoramin ILP kan neih atanga kum 150-na kan chuangkai tawh a, Mizoram sawrkar rawn loin ILP hi hlih theih a ni lo, tiin, MNF leh India sawrkar inremna thuthlungah chiang taka a inziah thu a sawi.

ILP portal thar hian harsatna hrang hrang a sutkian phah dawn bakah DC office-a thawktute nasa takin a chhawk zangkhai dawn tih a sawi a. Tourist-te tan sponsor neih a ngai loa, hnathawk leh sumdawnna thila lokalte tan sponsor-tu neih a ngai thung tih sawiin, “Hemi chungchangah hian sponsor-tute mawhphurhna kan inzirtir nasat a pawimawh hle,” a ti.

Online ILP portal siam puitlin a nih theih nana theihtawp chhuahtu Information & Communication Technology department chungah minister hian lawmthu a sawi a ni.

He portal hmang hian awlsam takin temporary ILP (ni 7 dam), temporary stay permit (ni 30 dam) leh ILP exemption certificate te online hmangin a dil theih a. Online hmang vekin fee a pek nghal theih dawn bakah fee an pek zawh hnuah awlsam takin certificate a download nghal mai theih bawk.

Kum 2018-2019 khan Mizoram sawrkarin ILP fee atangin Rs. 47,03,500 a hmu a; 2019- 2020 ah Rs. 152,94,750; 2020- 2021 ah Rs. 561,71,300, 2021- 2022 ah Rs. Rs 616,61,590 a hmu tih Home minister hian a sawi a ni.