Opium lakah Mizoram la himah ngai

Ruihhlo hlauhawm opium lakah Mizoram a la himah ngaih a ni a, Mizorama an mante pawh Mizoram pawna mi tur a lo ni thin.
Mizoram Excise & Narcotics (MEN) department hotute chuan opium lamah Mizoram a la himah an ngai a, mahse Mizoram hmun thenkhatah lo ti ve chu an awm, an ti.
Mizorama opium ti vete hi khawpuia cheng an ni lo an ti a, lo zu ve thin an awm ve an ti.
Opium hi man tur chu a awm ve leh zeuh thin a, excise force te’n an mante hi Mizoram pawna mi tur a ni thin an ti.
Mizoram hi ruihhlo tawlh kawng a ni a, khawchhak lam atanga khawvel hmun danga zawrh tur lakna kawng a ni. Chuvangin opium pawh hi man tur a awm thin an ti a, mahse meth anga tam chu a ni lo an ti. Meth pawh hi, Mizoram a la himah ngaih a ni a, mahse man tur chu a awm deuh reng. Opium hi chu meth angin a tam lo an ti.
Opium hi nikum khan tlemte an man a, kuminah pawh an la man lo. MEN department-in ruihhlo an man zat an chhinchhiahna enin opium hi man lo kum a tam a, man kumah pawh a tam ngai lo.
An chhinchhiahnaa a lan danin, 1995-ah khan kg 0.480 an man a, hei hi an man tan kum a ni. An man lo vang vang a, 2001-ah kg 4.809 an man leh a, a hnuah pawh an man. 2016-ah an man ta teuh a, kg 18.478 lai an man. Hei hi an man tam ber kum a ni a, mahse hemi kumah pawh hian mi pakhat hnen atanga tam thama an man lawih vanga man tam an ni.
MEN department hotute chuan inven reng chu a ngai a, mahse vanneihthlak takin ruihhlo ti thinte duh zawng a ni lo nia an hriat thu an sawi.

Opium man tawh zat
Kum Man zat
1995 0.480
2001 4.809
2002 0.480
2007 4.035
2008 1.153
2010 0.878
2011 2.500
2012 2.653
2016 18.478
2018 0.056
2019 2.177
2022 0.015
2023 0.066