“Ordinary” kar 10 a No.1 ta

On Aug 21, 2025 6 0

“Ordinary” kar 10 a No.1 ta
Alex Warren hla it “Ordinary” chu Billboard Hot 100 (US singles) chart-ah a No.1 a, he chart-a kar 10 a No.1-na a ni ta. He chart kum 67 an buatsaih tawh chhung hian No.1 ni thei hla 1,183 awm tawhin, chung zingah hla 47 chiah chu kar 10 chin No.1 ni thei an la ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Alex Warren “Ordinary” hian kar khat chhungin stream maktaduai 23.9, radio airplay ngaithlatu maktaduai 74 leh sales 7,000 a la nei thei a, hei hi chart-ah a No.1 pui leh ta a ni.
Kar kalta a chart No.1-a rawn inhlangkai, KPop Demon Hunters soundtrack HUNTRIX “Golden” chuan stream maktaduai 32.8, radio airplay ngaithlatu maktaduai 11.6 leh sales 7,000 nei lehin, No.1 atangin No.2-ah a tawlh ve thung.
Chart No.1 hlui Morgan Wallen “What I Want” featuring Tate McRae chu No.4 atangin No.3 a kai thar ve leh ta a, KPop Demon Hunters soundtrack Saja Boys “Your Idol” chu No.8 satangin No.4-ah a insawn a, top 5-ah a lan vawi khatna a ni. Ravyn Lenae “Love Me Not” chu No.6 atangin No.5-ah a insawn a, Justin Bieber “Daisies” chu No.5 atangin No.6-ah a tawlh ve thung.
Chart No.1 hlui Teddy Swims “Lose Control” chu No.9 atangin No.7 a kai thar leh ta a, he hla hi chart top 10-ah kar 74 lang tawhin, he chart top 10-a lang rei thei ber record a sawhnghet zel a, top 10 chauh ni lo, chart-a a lan hrim hrim pawh kar 104 a ni tawh a, hei pawh record tho a ni.
Morgan Wallen hla dang , chart No.2 pawh lo ni tawh “Just in Case” chu No.7 atangin No.8-ah a tawlh a, chart No.1 hlui, he chart-a kar 19 No.1 ni a, chart No.1 ni rei ber record nihrualtu Shaboozey “A Bar Song (Tipsy)” chu No.8 atangin No.9-ah a tawlh ta bawk.
KPop Demon Hunters soundtrack Saja Boys “Soda Pop”-in stream maktaduai 17.6 leh sales 3,000 neiin, No.14 atangin No.10 a kai a, he chart top 10-a KPop Demon Hunters soundtrack lang thei hla pathumna a ni.