Pacquiao hmaa ding tur Provodnikov

Pacquiao hmaa ding tur Provodnikov
Kumin April ni 18 khian exhibition bout-ah Manny Pacquiao leh Ruslan Provodnikov an innuai dawn.
Veteran Pacquiao hmaa ding tur hi light-welterweight world champion hlui niin, kum 47 mi hian kum li a chawlh hnuah nikum July thla khan boxing a luhchilh leh a, hruihrual chhunga a kirlehna inhnekah WBC welterweight champion Mario Barrios a hneh lo.
Eight-weight world champion Pacquiao hian ‘rematch’ khelh leh a duh thu sawi mah se exhibition bout lam a hawi zui ta zawk a ni.
Pacquiao leh kum 2016 daih tawha retire ve tawh Provodnikov-te’n 10-round exhibition an khelhna tur hmun hi Las Vegas khawpuia Thomas leh Mack Center niin, Filipino hian a inhnek apiangin an ram Philippines mipuiin an thlawp tlat thin thu leh chu chuan phurna leh thathona a pe thin tih a sawi.
Hming a chher tawhna Las Vegas tualchara kirleh chungchang tarlang telin, a tan he khawpui hi a hlu hle tih a sawi a, inhnek ropui peklet leh ngei a duh tih a sawilang tel bawk.
Pacquiao hi a professional record-ah vawi 62 chakin, vawi riat a tlawm a, draw vawi thum neiin, exhibition bout a hmachhawn hnuhnung vawi thumah tlawm a nei lo a, tum hnih chakin, draw vawi khat a nei.
Filipino hi nikum khan boxing Hall of Fame-ah lakluh a ni.
Tuntuma a tumpui tur Russian fighter Provodnikov hi kum 42 mi niin, a professional career-ah light-welterweight leh welterweight division-a khel thin niin, tum 25 a chak laiin vawi nga a tlawm thung.