Covid lengin sum indaihlohna a hrinchhuah avangin PAHOSS ah beisei angin hma an la chak thei loa, ruahmanna erawh siam zel a ni dawn tih chief minister Zoramthanga chuan a sawi.
Govt. Mizo High School Aizawl ramchhunga Multilevel Car Parking & Multipurpose Hall sak chu Nilaini zing khan chief minister hian a hawng a. Lirthei hunna leh hall tha tak mipui hman tangkai tura hawn a ni chu lawmawm a tih thu a sawi a. Aizawl khaw din tirh a nih lai leh tun dinhmun khaikhinin a hmelhmang, in awm zat leh lirthei tam dante a inthlau a. Tunah chuan khawpui tawt nen, tih thawl dan tur kawng hrang hrang dapa ruahman a tul tak thu leh sawrkar pawhin parking house scheme a siam thu a sawi.
Ram hmasawnna tur ruahmantu chuan ngaihtuahna fing tak nen hmathlir thui tak a neih a pawimawh zia a chiang tih a sawi a. PAHOSS chungchangah mi engemawzatin hna an thawh zawh hnu ah hrilengin a hrin sum indaihlohna avanga tum anga hma an lak chak theih loh thu sawiin, hmalakna erawh la tawp loin, ruahmanna siam zel a nih tur thu a sawi.
He hall sak chungchanga mawhphurtua ruat chu Transport department a ni a, a sak hna hi VINCO Construction-in a thawk. Transport department hian School Education department hnenah building hi an hlanchhawng a ni.
Building thar hawn hi state sum atanga sak niin, a vaiin cheng nuai 610.06 (main building nuai 495, vertical extension nuai 50, mass concrete nuai 60.06 & monitoring nuai 5) hman a ni a. 2021 February 1 khan inremna thu ziah niin, thla 24 chhung, 2023 February 1-a sak zawh tura ruahman a ni a, rokhawlhna eng eng emaw avangin April 30 thleng pawhsei a ni. Basement-ah car 15 leh two wheeler 30 lengin, ground floor-ah car 18 leh two wheeler 21 a leng a: a vaiin car 36 leh two wheeler 51 a dah theih. Third floor-ah multipurpose hall atanga ruahman niin, badminton court pathum a awm thei a ni.
PAHOSS-ah ruahmanna la siam zel dawn – Chief minister
Get real time updates directly on you device, subscribe now.
Prev Post
Next Post